ភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានគូសបញ្ជាក់ថា មានអ្នកវិភាគ ក៏ដូចជាបរទេសមួយចំនួនតែងតែរិះគន់ថា តើពេលណាទើបសម្តេចធិបតី ហ៊ុន ម៉ាណែត ដើរចេញពីស្រមោលឪពុក និងគណបក្សប្រជាជនកម្ពុជា? ការលើកឡើងបែបនេះ ត្រូវបានសម្តេចតេជោ ហៅថាជា «ការលើកឡើងបែបល្ងង់ខ្លៅ»។
នៅក្នុងពិធីកាត់ខ្សែបូសម្ពោធឆ្លងអគារសិក្សានិងសមិទ្ធផលនានានៅបរិវេណវត្តព្រះឥន្ទសាមគ្គីធម៌ ភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល នៅព្រឹកថ្ងៃទី១១ ខែកុម្ភៈ ឆ្នាំ២០២៥ សម្តេចតេជោ ហ៊ុន សែន បានថ្លែងថា ការប្រគល់អំណាចទៅរាជរដ្ឋាភិបាលបន្តវេននេះ ធ្វើឡើងទៅតាមគោលនយោបាយគណបក្ស និងការបោះឆ្នោតប្រកបដោយលទ្ធិប្រជាធិបតេយ្យ។ ដូច្នេះនាយករដ្ឋមន្រ្តី មិនអាចដើរហួសបន្ទាត់នយោបាយរបស់គណបក្សបានទេ។
សម្តេចតេជោ ហ៊ុន សែន ក៏បានផ្តាំទៅក្រុមអ្នកវិភាគនិងពួកបរទេសមួយចំនួនដែលតែងតែរិះគន់ទាំងនោះ ត្រូវស្វែងយល់ពីប្រព័ន្ធនៃការបោះឆ្នោតនៅកម្ពុជា ព្រោះថានៅកម្ពុជាអនុវត្តប្រព័ន្ធបោះឆ្នោតតាមបែបសមាមាត្រ ដែលគណបក្សគឺជាអ្នកជ្រើសរើសនាយករដ្ឋមន្រ្តីចេញពីគណបក្សដែលឈ្នះឆ្នោត រួចហើយស្នើសុំការអនុម័តពីរដ្ឋសភា។ ដូចនេះហើយ នាយករដ្ឋមន្រ្តីត្រូវអនុវត្តនូវកម្មវិធីនយោបាយរបស់គណបក្សដែលបានដាក់ចេញ ដើម្បីកសាងនិងអភិវឌ្ឍប្រទេសជាតិ។
សម្តេចតេជោ ហ៊ុន សែន លើកឡើងថា ៖ កុំថាឡើយអ្នកផ្សេងកូនខ្លួនឯងក៏នឹងត្រូវដកចេញពីដំណែងដែរ ប្រសិនបើហ៊ាន ដើរ ឬអនុវត្តផ្ទុយពីគោលនយោបាយរបស់គណបក្ស។ ការលើកឡើងរបស់សម្តេចតេជោ គឺឆ្លើយតបចំ ពោះអ្នកវិភាគ និងក្រុមបរទេសមួយចំនួនដែលតែងតែនិយាយថា«ពេលណាហ៊ុន ម៉ាណែត ដើរចេញពីស្រមោលឪពុក ឬស្រមោលគណបក្សប្រជាជនកម្ពុជា»នោះ។
សម្តេចតេជោ ហ៊ុន សែន បានលើកឡើងថា ក្រុមប្រឆាំងមួយចំនួន បានយករឿងរ៉ាវសញ្ញាបត្ររបស់សម្តេចធិបតី ហ៊ុន ម៉ាណែត ធ្វើជាអាជីវកម្មនយោបាយ និងដើម្បីកេងចំណេញនយោបាយ។ ការលើកឡើងរបស់សម្តេចតេជោនេះគឺចង់ចំអកទណ្ឌិតក្បត់ជាតិ និងបក្សពួក ដែលតែងតែអះអាងថាខ្លួនឯងឆ្លាត តែឲ្យអ្នកល្ងង់ប្រើក្បាលទៅវិញ ជាពិសេសការកែរដ្ឋធម្មនុញ្ញពី២ភាគ៣ទៅ៥០បូក១នោះ៕
ដោយ ៖ សិលា