សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: បុរសម្នាក់ជិះម៉ូតូហុងដាឌ្រីមបោះពួយលឿនជ្រុលទៅបុករថយន្តដឹកបន្លែនៅផ្លូវបំបែកជាបួនបណ្ដាលឱ្យអ្នកជិះម៉ូតូរងរបួសធ្ងន់ ។
ហេតុការណ៍នេះបានកើតឡើងនៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី១ ខែមីនា ឆ្នាំ២០២៥ តាមបណ្ដោយផ្លូវម៉ៅសេទុងកែងផ្លូវ២០៥ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់បានបើករថយន្តប្រភេទដឹកទំនិញម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2E-0020 ដោយរថយន្តខាងលើបានដឹកបន្លែចម្រុះពេញរថយន្តបើកតាមបណ្ដោយផ្លូវ២០៥ក្នុងទិសដៅពីកើតទៅលិច លុះមកដល់ចំណុចកើតហេតុដែលជាផ្លូវបំបែកជាបួនក៏ស្រាប់តែមានបុរសម្នាក់បានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1GC-5880 ធ្វើដំណើរតាមបណ្ដោយផ្លូវម៉ៅសេងទុងក្នុងទិសដៅពីត្បូងទៅជើងដោយល្បឿនលឿនហើយជាន់ហ្រ្វ័ងមិនទាន់ក៏ជ្រុលទៅបុករថយន្តយ៉ាងពេញទំហឹង ធ្វើឱ្យម៉ូតូខ្ទេចផ្នែកខាងមុខ ឯអ្នកបើកម៉ូតូរងរបួសបែកក្បាលសន្លប់ស្តូកស្តឹងត្រូវបានបញ្ជូនទៅសង្គ្រោះនៅមន្ទីរពេទ្យរុស្ស៊ី ។
ដោយឡែកខាងរថយន្តរងការខូចខាតទ្វារមុខចំហៀងខាងឆ្វេងបែកកញ្ចក់អ្នកបើកបរអត់រងបួសនោះទេ តែបានគេចចេញទៅបាត់ ។
ក្រោយកើតហេតុអត់មានដំណោះស្រាយ មធ្យោបាយទាំងអស់ត្រូវសមត្ថកិច្ចជំនាញវាស់វែងយកទៅរក្សាទុកនៅការិយាល័យចរាចរណ៍ផ្លូវគោករង់ចាំដំណោះស្រាយ ៕
ដោយ៖សុខាសែនជ័យ
