សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្ដីប្រពន្ធពីរនាក់បានរងរបួសធ្ងន់ត្រូវបានសាច់ញាតិដឹកបញ្ជូនយកទៅសង្គ្រោះបន្ទាន់ ខណៈបើកម៉ូតូឌុបគ្នាត្រូវយុវជនម្នាក់ជិះម៉ូតូមិនចាំម៉ាកយ៉ាងលឿនជ្រុលបុកម៉ូតូប្តីប្រពន្ធហើយខាងជនបង្កបានជិះរត់គេចខ្លួនទៅបាត់។
ហេតុការណ៍គ្រោះថ្នាក់ចរាចរណ៍នេះបង្កឲ្យមានការភ្ញាក់ផ្អើលឡើងកាលម៉ោង៩យប់ថ្ងៃទី២៤ ខែមីនា ឆ្នាំ២០២៥ ស្ថិតនៅតាមបណ្ដោយផ្លូវបេតុងថ្មគោល សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកេីតហេតុគេឃើញជនរងគ្រោះពីរនាក់ប្ដីប្រពន្ធជិះម៉ូតូម៉ាកហុងដាឌ្រីមសង់២០២២ ពណ៌ខ្មៅ ពាក់ស្លាកលេខភ្នំពេញ1JC-8830 ធ្វើដំណើរតាមបណ្ដោយផ្លូវបេតុងក្នុងទិសដៅពីកេីតមកលិច ខណៈមកចំណុចកេីតហេតុ ស្រាប់តែឃើញយុវជនម្នាក់ជិះម៉ូតូមួយគ្រឿងមិនចាំម៉ាកធ្វើដំណើរបញ្រ្ចាសទិសគ្នាពីលិចមកកេីតក្នុងល្បឿនលឿនរួចបានទៅបុកម៉ូតូរងគ្រោះពេញទំហឹងបណ្ដាលឲ្យដួលបោកនឹងផ្លូវរងរបួសធ្ងន់ទាំងពីរនាក់ប្ដីប្រពន្ធ ចំណែកជនបង្កបានលើកម៉ូតូជិះរត់គេចខ្លួនទៅបាត់ស្រមោល ចំណែកជនរងគ្រោះត្រូវបានសាច់ញាតិយករថយន្តមកដឹកបញ្ជូនទៅសង្គ្រោះបន្ទាន់ភ្លាមៗ ។
បន្ទាប់ពីកេីតហេតុម៉ូតូជនរងគ្រោះត្រូវបានសមត្ថកិច្ចនគរបាលមូលដ្ឋានសង្កាត់ចោមចៅ២ចុះមកយកទៅរក្សាទុកនៅប៉ុស្តិ៍បណ្ដោះអាសន្នរង់ចាំប្រគល់អោយម្ចាស់វិញនៅពេលក្រោយ ៕
ដោយ៖ ជ្រោយពេជ្រ
