សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃទី៣០ ខែមីនា ឆ្នាំ២០២៥នេះ តំណាងគណបក្សភ្លើងទៀន និងគណបក្សឆន្ទៈ បានដឹកនាំគណៈប្រតិភូ អញ្ជើញដាក់កម្រងផ្កា និងគោរពវិញ្ញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការក្រសួងសាធារណការ និងដឹកជញ្ជូន និងត្រូវជាបងប្រុសទី១ របស់សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា នៅគេហដ្ឋាននៃសព ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។
តំណាងគណបក្សភ្លើងទៀន និងគណបក្សឆន្ទៈ បានសម្តែងនូវសមានទុក្ខ អាឡោះអាល័យ និងក្តីសង្វេគជាពន្លឹក និងសូមចូលរួមរំលែកទុក្ខដ៏កៀមក្រំជាមួយ សម្តេចអគ្គមហាសេនាបតីតេជោ ហ៊ុន សែន ព្រមទាំងក្រុមគ្រួសារញាតិមិត្តបងប្អូនសាច់សាលោហិត។ មរណភាពរបស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន គឺជាការបាត់បង់បងប្រុស ឪពុក ជីតាជាទីស្រលាញ់ ប្រកបដោយសង្គហធម៌ដ៏ឧត្តុង្គឧត្តម និងជាកុលបុត្រខ្មែរដ៏ឆ្នេីមមួយរូបដែលមានមនសិការស្នេហាជាតិ មោះមុត បូជាកម្លាំងកាយចិត្ត ប្រាជ្ញាស្មារតី ក្នុងការចូលរួមយ៉ាងសកម្មក្នុងចលនារំដោះជាតិពីរបបប្រល័យពូជសាសន៍ និងបានរួមចំណែកជាមួយរាជរដ្ឋាភិបាលកម្ពុជា ក្នុងបុព្វហេតុជាតិ សាសនា ព្រះមហាក្សត្រ ដោយបានចួលរួមកសាង ការពារ និងរក្សានូវសន្តិភាព ស្ថិរភាព ឯកភាពជាតិ សេដ្ឋកិច្ច និងការអភិវឌ្ឍលេីគ្រប់វិស័យ។ គំរូវីរភាពដ៏ថ្លៃថ្លា របស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន នឹងត្រូវកុលបុត្រខ្មែរគ្រប់ជំនាន់ចងចាំជានិច្ច។
តំណាងគណបក្សភ្លើងទៀន និងគណបក្សឆន្ទៈ សូមឧទ្ទិសបួងសួងជូនវិញ្ញាណក្ខន្ធរបស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន បានអញ្ជេីញទៅចាប់បដិសន្ធិក្នុងសុគតិភពកុំបីឃ្លៀងឃ្លាតឡេីយ៕
ដោយ ៖ សិលា
