សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ ៖ រាជរដ្ឋាភិបាលនៃប្រទេសថៃ នៅព្រឹកថ្ងៃទី ៣០ មីនា ឆ្នាំ២០២៥នេះ បានបញ្ជូនក្រុមជួយសង្គ្រោះទៅកាន់ប្រទេសមីយ៉ាន់ម៉ា ដើម្បីផ្តល់ជំនួយមនុស្សធម៌ បន្ទាប់ពីគ្រោះរញ្ជួយដីកម្រិត ៨.២ រិចទ័រ បានវាយប្រហារប្រទេសនេះ កាលពីថ្ងៃសុក្រ។ ការបញ្ជូននេះ ទាំងដែលថៃខ្លួនឯងក៏រងការប៉ះពាល់។
ក្រុមអ្នកជួយសង្គ្រោះថៃ បានប្រមូលផ្តុំគ្នានៅស្ថានីយអាកាសយោធាទី ២ ក្នុងព្រលានដុនមឿង ទីក្រុងបាងកក មុនពេលចាកចេញទៅកាន់ប្រទេសមីយ៉ាន់ម៉ា។ប្រតិបត្តិការនេះ ចែកទៅជាក្រុមចំនួនប្រាំបី៖ អង្គភាពត្រួតពិនិត្យ កងកម្លាំងកិច្ចការយោធាបរទេស ការស្វែងរក និងជួយសង្គ្រោះទីក្រុង វេជ្ជសាស្ត្រ ការវាយតម្លៃការខូចខាត ការទំនាក់ទំនង ទំនាក់ទំនងសាធារណៈ និងសន្តិសុខ។
គួរបញ្ជាក់ថា ក្រៅពីប្រទេសថៃ ក្នុងតំបន់អាស៊ានក៏មានប្រទេសបញ្ជូន ក្រុមអ្នកជួយសង្គ្រោះទៅកាន់មីយ៉ាន់ម៉ាផងដែរ ក្នុងនោះមាន វៀតណាម ម៉ាឡេស៊ីជាដើម។ ដោយឡែករាជរដ្ឋាភិបាល និងប្រជាជនកម្ពុជា មានការរន្ធត់ចិត្តជាខ្លាំង ដែលបានទទួលដំណឹងពីការ ស្លាប់ និងរបួសជាច្រើននាក់ ដែលបណ្តាលមកពីគ្រោះរញ្ជួយដី ដែលបានវាយប្រហារលើប្រទេស មីយ៉ាន់ម៉ា និងថៃ កាលពីរសៀលថ្ងៃទី២៨ ខែមីនា ឆ្នាំ២០២៥។
យើងសូមចូលរួមរំលែកមរណទុក្ខដ៏ក្រៀមក្រំដល់រដ្ឋាភិបាល និងប្រជាជនមីយ៉ាន់ម៉ា និងថៃ ក្នុងគ្រានៃទុក្ខសោកដ៏ក្រៀមក្រំនេះ។ យើងសូមសម្តែងនូវសាមគ្គីភាពជាមួយរដ្ឋាភិបាល និងប្រជាជន នៃប្រទេសទាំងពីរ។
ក្នុងឱកាសដ៏ក្រៀមក្រំនេះ រាជរដ្ឋាភិបាលកម្ពុជា សូមចូលរួមរំលែកទុក្ខដ៏ជ្រាលជ្រៅជាមួយ ក្រុមគ្រួសារជនរងគ្រោះ និងសូមជូនពរឱ្យអ្នករបួសទាំងឡាយបានឆាប់ជាសះស្បើយ ៕
ដោយ ៖ សិលា
