សង្គ្រាមស៊ីវិលរវាងក្រុមក្រុមឧទ្ទាមមីយ៉ាន់ម៉ានឹងរដ្ឋាភិបាលត្រូវបានផ្អាក ដើម្បីសម្រួលដល់ប្រតិបត្តិការជួយសង្រ្គោះ

ចែករំលែក៖

សារព័ត៌មាន AFP បានផ្សាយថា ក្រុមឧទ្ទាមនៅក្នុងប្រទេសមីយ៉ាន់ម៉ា បានប្រកាសបទឈប់បាញ់មួយផ្នែករយៈពេល២សប្ដាហ៍ ខណៈរបបយោធានៅថ្ងៃអាទិត្យ ទី៣០ ខែមីនា បានចាប់ផ្ដើមសម្របសម្រួលដល់ប្រតិបត្តិការជួយសង្រ្គោះ និងការផ្ដល់ជំនួយ បន្ទាប់ពីគ្រោះរញ្ជួយដីដ៏ប្រល័យមួយបានវាយប្រហារលើប្រទេសដែលកំពុងមានសង្រ្គាមស៊ីវិលមួយនេះ។
នៅក្នុងសេចក្ដីថ្លែងការណ៍មួយ រដ្ឋាភិបាលស្រមោលរួបរួមជាតិបានឱ្យដឹងថា កងកម្លាំងការពារប្រជាជន (PDF) នឹងអនុវត្តបទឈប់បាញ់រយៈពេល២សប្ដាហ៍ នៅក្នុងប្រតិបត្តិការវាយលុក លើកលែងសកម្មភាពការពារខ្លួន នៅតាមតំបន់ដែលរងគ្រោះដោយសារគ្រោះរញ្ជួយដី ដោយនឹងចាប់ផ្ដើមនៅថ្ងៃទី៣០ ខែមីនា ឆ្នាំ២០២៥»។ រដ្ឋាភិបាលស្រមោលក៏បានបញ្ជាក់ដែរថា ខ្លួននឹងធ្វើការសម្របសម្រួលជាមួយ UN និងបណ្ដាអង្គការក្រៅរដ្ឋាភិបាលនានា ដើម្បីធានានូវសន្តិសុខ ការដឹកជញ្ជូន ព្រមទាំងការបង្កើតជំរំជួយសង្រ្គោះ និងតង់ស្នាក់នៅបណ្ដោះអាសន្ននៅតាមតំបន់ដែលខ្លួនកំពុងគ្រប់គ្រង។
គ្រោះរញ្ជួយដីកម្រិត ៧.៧រ៉ិចទ័របានវាយប្រហារលើភាពពាយព្យនៃទីក្រុង Sagaing នៅភាគកណ្ដាលនៃប្រទេសមីយ៉ាន់ម៉ា កាលពីថ្ងៃសុក្រ ទី២៨ ខែមីនា ហើយក៏បង្កផលប៉ះពាល់ដល់ប្រទេសក្បែរខាងដូចជាថៃផងដែរ។ តាមរដ្ឋាភិបាលយោធាមីយ៉ាន់ម៉ា មនុស្សយ៉ាងហោច ១៦៤៤នាក់បានស្លាប់ ខណៈនៅទីក្រុងបាងកក មានអ្នកស្លាប់ ១០នាក់ ដោយសារគ្រោះរញ្ជួយដីនេះ៕