សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រសួងយុត្តិធម៌ នៅថ្ងៃទី ៣០ ខែមីនា ឆ្នាំ២០២៥ ម្សិលមិញ បានចេញនូវសេចក្តីប្រកាសព័ត៌មានស្តីពីលទ្ធផលស្រាវជ្រាវលើកណរីបណ្តឹងរបស់ លោកស្រី សែម សុខគា ដែលបានស្នើសុំអន្តរាគមន៍ស្វែងរកយុត្តិធម៌ ជុំវិញករណីដីធ្លីនៅតំបន់ភ្នំ១៥០០ ខេត្តពោធិ៍សាត់។ជាលទ្ធផលក្រោយការបើកប្រតិបត្តិការស្រាវជ្រាវ ក្រសួងយុត្តិធម៌រកឃើញថា ទីតាំងដីដែលលោកស្រី សែម សុខគា កំពុងកាន់កាប់ស្ថិតនៅក្នុងតំបន់សហគមន៍ នៃតំបន់ ការពារធម្មជាតិ (តំបន់អន្ទង់អាំង) ហើយលោកស្រីមានដីយ៉ាងតិច៦កន្លែងក្រៅតំបន់ការពារដោយបានដាក់ធនាគារជាង ១០ម៉ឺនដុល្លារ។
ចំណែកប្លង់ដីដែលអ្នកស្រីថតបង្ហោះក្នុងបណ្តាញសង្គម គឺជាប្លង់ដីផ្សេង។
អ្នកនាំពាក្យនៃក្រសួងយុត្តិធម៌ សូមបញ្ជាក់ជូនថា ដីស្ថិតនៅក្នុងតំបន់សហគមន៍ នៃតំបន់ការពារធម្មជាតិ (តំបន់អន្ទង់ អាំង) គឺជាដីរបស់រដ្ឋ ហើយរដ្ឋបានសម្រេចដកហូតដីដែលត្រូវបានកាន់កាប់ដោយខុសច្បាប់នៅក្នុងតំបន់ការពារធម្មជាតិនេះយកមកវិញ ដើម្បីជាប្រយោជន៍រួមរបស់ប្រជាជនទូទាំងប្រទេស គឺមិនមែនសម្រាប់ជាប្រយោជន៍របស់បុគ្គលឯកជនណាមួយនោះទេ។
លោក ឯម ច័ន្ទមករា រដ្ឋលេខាធិការក្រសួងយុត្តិធម៍ លើកជាសំណួរ ចម្ងល់ ធ្វើការពន្យល់ថា ៖ តើបងស្រី សែម សុខគា ពិតជារងអំពើ «អយុត្តិធម៌» មែនឬទេ?
ទី១-បងស្រី «ស្រែកទាមឱ្យក្រសួងយុត្តិធម៌ រកយុត្តិធម៌ជូន» ជាក់ស្តែង បងស្រីមិនមកតាមការអញ្ជើញរបស់ក្រសួងយុត្តិធម៌ដើម្បីរកយុត្តិធម៌ជូន រហូតដល់ទៅ ៣ដង ក្នុងរយៈពេលមិនដល់ ២សប្តាហ៍ផង ដោយយកមូលហេតុ ចៅឈឺ ម្តាយឈឺ ហើយបងស្រីឈឺភ្លាមៗ។
ទី២-បងស្រី ថា «ដីបងស្រីមិនពាក់ព័ន្ធនឹងផ្លូវអន្ទង់អាំងទេ» ជាក់ស្តែង ក្រុមការងារចុះទៅពិនិត្យផ្ទាល់ គឺដីនោះស្ថិតក្នុងតំបន់អន្ទង់អាំង ពិតប្រាកដ! ហើយនៅក្នុងតំបន់នោះ ពុំមានដីណា មួយមានវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) នោះទេ។
ទី៣-បងស្រី ថា «ដីបងដែលកំពុងតវ៉ា មានប្លង់រឹង» ជាក់ស្តែង ប្លង់រឹងដែលបងស្រីបានលើកកាន់បង្ហាញក្នុងបណ្តាញសង្គមនោះ គឺ «ដីផ្សេង ប្លង់ផ្សេង» ឆ្ងាយពីគ្នាចម្ងាយ ២ ៧៦៩ ម៉ែត្រ ពីទីតាំងដី ដែលបងស្រី សែម សុខគា កំពុងកាន់កាប់ក្នុងតំបន់ការពារ ។ បងស្រី បានដឹងរឿងនេះតាំងពីអំឡុងឆ្នាំ២០១៧ មកម៉្លេះ ប៉ុន្តែ បងស្រី នៅតែលើកឡើងអំពីរឿងប្លង់រឹងនេះ ខុសពីការពិត តាមបណ្តាញសង្គម ដែលធ្វើឱ្យមានការភ័ន្តច្រឡំជាសាធារណៈ។
ទី៤-បងស្រី ថា «ត្រូវបានគេចោទប្រកាន់ថារុករានព្រៃ […] ខ្ញុំ មិនមែនជាការពិត សុំជួយខ្ញុំផង…(យំ) ដីប្លង់រឹងទេ!» បងស្រីបន្ថែមថា «ប្លង់ (បង្ហាញក្នុងបណ្តាញសង្គម)ដាក់ធនាគារចំនួន ១១ម៉ឺនដុល្លា រយៈពេលជាង ១០ ឆ្នាំហើយ មិនដែលមានបញ្ហាអ្វីទេ…ខ្ញុំក្រ ខ្ញុំមានចៅ» ជាក់ស្តែង បងស្រី មិនមែនមានដីតែមួយកន្លែងនេះទេ គឺលោកស្រីមានដីយ៉ាងតិច ចំនួន ៦កន្លែង ផ្សេងៗទៀត ដែលនៅក្រៅពីតំបន់ការពាររបស់រដ្ឋ ហើយតាមពិត ប្លង់ដីទាំងអស់នោះទេ ដែលបងស្រី សែម សុខគា បានយកទៅដាក់ធានាបំណុលធនាគារ ជាង ១០ម៉ឺនដុល្លារអាម៉េរិក។
ទី៥-បងស្រី ថា «ខ្ញុំដើរមកដល់គ្រប់ក្រសួងទាំងអស់ ចុះមន្ត្រីរាជការបម្រើរាស្ត្រ ពេលរាស្ត្រមានទុក្ខ រាស្ត្រដើរមកដល់ក្រសួងហើយ ហេតុអី មិនជួយផង?» ជាក់ស្តែង ក្រុមការងារខលទូរសព្ទទៅអញ្ជើញបងស្រី ១ថ្ងៃក្រោយពេលទទួលលិខិតសុំអន្តរាគមន៍មកក្រសួងយុត្តិធម៌, បានផ្ញើលិខិតអញ្ជើញបងស្រី ៣-៤ថ្ងៃមកទៀត សរុបទាំងអស់ ៣ ដង, គ្រួសារបងស្រី និងបងស្រី ពិតជាបានទទួលលិខិតអញ្ជើញ ប៉ុន្តែបងស្រីនៅតែមិនមករកយុត្តិធម៌ដូចការស្រែកទាមទារសោះ រហូតដល់ក្រសួងយុត្តិធម៌ ធ្វើ លិខិតទៅប្រធានសាលាដំបូងខេត្តពោធិ៍សាត់ និងព្រះរាជអាជ្ញាអមសាលាដំបូងខេត្តពោធិ៍សាត់ ស្នើសុំឱ្យបង្អង់នីតិវិធី ដើម្បីផ្តល់នូវការធានា និងបង្ក លក្ខណៈល្អប្រសើរឱ្យបងស្រី អាច ចូលមកបំភ្លឺលើបណ្តឹងស្នើសុំអន្តរាគមន៍របស់ខ្លួន ហើយក្រុមការងារធានាជូនទៀត ប៉ុន្តែបងស្រីនៅតែមិនព្រមសហការណ៍ដើម្បីមករកយុត្តិធម៌ដោយខ្លួនឯង។
លោករដ្ឋលេខាធិការបញ្ជាក់ថា ៖ សរុបសេចក្តីមក តើបងស្រី សែម សុខគា ពិតជាមានចេតនាក្នុងការរកយុត្តិធម៌សម្រាប់ខ្លួនឯងដែលឬទេ? ៕
ដោយ ៖ សិលា
