សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ មន្ត្រីរដ្ឋាភិបាលថៃបានឱ្យដឹងថាពិធីបុណ្យ ចូលឆ្នាំថ្មី ឬហៅថាសង្រ្កាន្ត ឆ្នាំនេះត្រូវបានគេរំពឹងថានឹងរកចំណូលបាន 134.63 ពាន់លានបាតសម្រាប់សេដ្ឋកិច្ចថៃ កើនឡើង 4.5% បើធៀបនឹងឆ្នាំមុន។
ដកស្រង់ការស្ទង់មតិដោយសាកលវិទ្យាល័យសភាពាណិជ្ជកម្មថៃ អ្នកនាំពាក្យរងរដ្ឋាភិបាលលោក Anukool Pruksanusak បាននិយាយកាលពីថ្ងៃអាទិត្យថា ការព្យាករណ៍នៅឆ្នាំនេះលើសពី 128.83 ពាន់លានបាតដែលបានកត់ត្រាក្នុងពិធីបុណ្យកាលពីឆ្នាំមុន ហើយគឺខ្ពស់ជាង 69 ពាន់លានបាតដែលបង្កើតនៅឆ្នាំ 2020 ។ លោក Anukool បាននិយាយថា “ប្រជាជនថៃកំពុងចំណាយកាន់តែច្រើនក្នុងអំឡុងពេល សង្រ្គាន ដែលឆ្លុះបញ្ចាំងពីទំនុកចិត្តលើសេដ្ឋកិច្ច និងទេសចរណ៍ ដែលទាំងពីរកំពុងងើបឡើងវិញជាបន្តបន្ទាប់។”
មានតែ 5% នៃអ្នកឆ្លើយតបមានគម្រោងកាត់បន្ថយការចំណាយរបស់ពួកគេ ដែលជាសមាមាត្រតូចបំផុតក្នុងរយៈពេលជាង 9 ឆ្នាំ។ ទន្ទឹមនឹងនេះដែរ 72.1% មានបំណងធ្វើដំណើរក្នុងអំឡុងពិធីបុណ្យសង្ក្រាន្ត ដែលជាអត្រាខ្ពស់បំផុតចាប់តាំងពីឆ្នាំ 2019 ដែលបង្ហាញពីទំនុកចិត្តសាធារណៈយ៉ាងខ្លាំងចំពោះស្ថានភាពទូទៅរបស់ប្រទេស។ ទោះបីជាមានការរញ្ជួយដីនាពេលថ្មីៗនេះក៏ដោយ អ្នកឆ្លើយតបនឹងការស្តង់មតិ 74.5% បានរាយការណ៍ថាមិនមានការផ្លាស់ប្តូរទម្លាប់ចំណាយរបស់ពួកគេទេ ដោយមានតែ 11.1% កាត់បន្ថយ និង 14.4% បង្កើនការចំណាយរបស់ពួកគេ។ ទាក់ទិននឹងផែនការធ្វើដំណើរសម្រាប់ពិធីបុណ្យសង្រ្កាន្ត ៧១.៧% បានបញ្ជាក់ថា មិនមានការផ្លាស់ប្តូរទេ ខណៈ ១៧.១% គ្រោងចំណាយបន្ថែម។ អ្នកនាំពាក្យរងរដ្ឋាភិបាលបាននិយាយថា មនុស្សភាគច្រើននៅតែមានគម្រោងចូលរួមក្នុងសកម្មភាពបុណ្យសង្ក្រាន្តជាធម្មតា ប៉ុន្តែត្រូវបង្កើនការប្រុងប្រយ័ត្ន ជៀសវាងសកម្មភាពនៅក្នុងអគារខ្ពស់ៗ ឬសំណង់ដែលអាចនឹងមិនស្ថិតស្ថេរ។
លោកAnukool បានបន្តទៀតថា ប្រតិបត្តិករអាជីវកម្មបង្ហាញថា ស្ថានភាពបន្ទាប់ពីការរញ្ជួយដីគឺធម្មតា មិនមានការផ្លាស់ប្តូរការលក់ ការកក់សណ្ឋាគារ ឬការធ្វើដំណើរតាមផ្លូវអាកាសនោះទេ។ គេរំពឹងថាការលក់ និងការប្រើប្រាស់សេវាកម្មនឹងកើនឡើងក្នុងអំឡុងពិធីបុណ្យសង្ក្រាន្ត ដោយសារតែបរិយាកាសទេសចរណ៍រស់ឡើងវិញ។ លោកបានបញ្ជាក់ថា រដ្ឋាភិបាលបានណែនាំដល់ស្ថាប័នពាក់ព័ន្ធត្រូវចុះត្រួតពិនិត្យសុវត្ថិភាពសណ្ឋាគារ កន្លែងទេសចរណ៍ និងសំណង់អគារនៅតំបន់គ្រោះថ្នាក់ ដោយត្រូវអនុវត្តវិធានការសុវត្ថិភាពយ៉ាងតឹងរ៉ឹង៕
ដោយ៖ធីរីណា
