ភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការអបអរសាទររីករាយពិធីបុណ្យចូលឆ្នាំថ្មី ប្រពៃណីជាតិខ្មែរយើង មិនមែនជាការពង្វក់យុវជនមិនឱ្យគិតគូរពីរឿងជាតិដូចការលើកឡើងរបស់មជ្ឈដ្ឋានមួយចំនួនតូចនោះទេ។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ ស្ពានអាកាស មរតកតេជោ នៅព្រឹកថ្ងៃទី៧ ខែមេសា ឆ្នាំ២០២៥ សម្តេចបវរធិបតី ហ៊ុន ម៉ាណែត បានថ្លែងថា សម្តេចពិតជាមានការហួសចិត្ត ដែលមានបុគ្គលមួយចំនួន ចេញមកនិយាយថា ការរៀបចំតុបតែងអង្គរសង្រ្កាន្តដើម្បីស្វាគមន៍ឆ្នាំថ្មី គឺជាការពង្វក់យុវជនកុំឱ្យគិតគូររឿងជាតិទៅវិញ។
សម្តេចបវរធិបតី ហ៊ុន ម៉ាណែត បានគូសបញ្ជាក់ថា មានក្រុមមួយចំនួន តែងតែព្យាយាមរិះគន់ បន្តុះបង្អាប់ការដឹកនាំរបស់រាជរដ្ឋាភិបាល ព្រមទាំងកេងចំណេញនយោបាយគ្រប់រឿងទាំងអស់សូម្បីតែដឹងថាទង្វើបែបនោះមិនមែនជារឿងត្រឹមត្រូវទាល់តែសោះក៏ដោយ។
សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា រាជរដ្ឋាភិបាលខិតខំប្រឹងប្រែងក្នុងការពង្រឹងវិស័យទេសចរណ៍ តាមរយៈការរៀបចំ ព្រឹត្តិការណ៍អង្គរសង្រ្កាន្តនៅខែមេសា ឆ្នាំ២០២៥ខាងមុខនេះ ប៉ុន្តែបែរជាមានវិទ្យុបរទេសមួយចំនួន ចោទប្រកាន់ថា ជារឿងអត់ប្រយោជន៍ទៅវិញ។
សម្តេចធិបតី ហ៊ុន ម៉ាណែត បានថ្លែងថា ការរៀបចំអង្គរសង្រ្កាន្តនៅឆ្នាំ២០២៥ នេះ គឺជាការបង្កើត ព្រឹត្តិការណ៍ទេសចរណ៍មួយទៀត ដើម្បីទាក់ទាញ និងជំរុញវិស័យទេសចរណ៍ ដែលនឹងជួយលើក កម្ពស់ជីវភាពប្រជាជននៅក្នុងខេត្តសៀមរាបផងដែរ។
សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ការរៀបចំព្រឹត្តិការណ៍ទេសចរណ៍នេះ មិនមែនដើម្បីពង្វក់យុវជនកុំឱ្យគិតពីបញ្ហាសង្គម ឬក៏ដើម្បីបង្កើនប្រជាប្រិយភាពរបស់រាជរដ្ឋាភិបាល នោះទេ ប៉ុន្តែ នេះជាព្រឹត្តិការណ៍ដែលត្រូវបានរៀបចំឡើងដើម្បីទាក់ទាញទេសចរបរទេសដើម្បីជំរុញកំណើនសេដ្ឋកិច្ចតែប៉ុណ្ណោះ៕
ដោយ ៖ សិលា