សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកសរ សុដានី អភិបាលរងខេត្តស្វាយរៀងបានថ្លែងថា គ្រោះថ្នាក់ចរាចរណ៍នៅតែជាក្តីបារម្ភ សម្រាប់មនុស្សគ្រប់រូប ដូច្នេះសូមចូលរួមគោរពច្បាប់ចរាចរណ៍អោយបានខ្ជាប់ខ្ជួនទាំងអស់គ្នា ដោយថ្ងៃនេះថ្ងៃស្អែកសូមកុំអោយមានគ្រោះថ្នាក់ចរាចរណ៍។
ការថ្លែងលើកឡើងបែបនេះ ក្នុងឱកាសដែលលោកសរ សុដានី តំណាងលោប៉េង ពោធិ៍សាអភិបាលខេត្ត ញ្ជើញចូលរួមក្នុងពិធីអប់រំផ្សព្វផ្សាយស្តីពីច្បាប់ចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពក្នុងការដឹកជញ្ជូនជូន ដល់អ្នកបើកបរយានយន្តដឹកកម្មករ និងកម្មករ និយោជិត ដែលកម្មវិធីនេះ រៀបចំដោយបេឡាជាតិសន្តិសុខសង្គម នៅសាលប្រជុំតំបន់សេដ្ឋកិច្ចពិសេស (មេនហាតធេន)នាព្រឹកថ្ងៃទី១០ ខែឧសភាឆ្នាំ ២០២៥។
ពិធីនេះមានការចូលរួមពីតំណាងអាជ្ញាធរ ស្ថាប័នពាក់ព័ន្ធមួយចំនួន តំណាងតំបន់សេដ្ឋកិច្ចពិសេស មេនហាតធេន តំណាងមកពី៦រោងចក្រក្នុងតំបន់សេដ្ឋកិច្ចពិសេស (មេនហាតធេន) ដែល ១រោងចក្រមានកម្មករ និយោជិតចូលរួមចំនួន ៥០នាក់ សរុប ៣០០នាក់ អ្នកបើកបរយានយន្តដឹកកម្មករចំនួន ១៥០នាក់ ក្នុងនោះរួមមាន៖
១.រោងចក្រ ថបស្ព័ត ថេកស្ថាយ
២.រោងចក្រ អុិលីត ខេមបូឌា ខូ.,អិលធីឌី
៣.រោងចក្រ ស៊ីកូ ខេមបូឌា ខូ.,អិលធីឌី
៤. រោងចក្រ ឃីងមេកឃើ ហ្វ៊ូតវែ
៥.រោងចក្រ សាន ហ្វេង ខេមបូឌា ខូ.,អិលធីឌី
៦. រោងចក្រ ស្ពីតថេក ខេមបូឌា។
បន្ថែមលើសពី លោកអភិបាលរងខេត្ត បានអំពាវនាវដល់កម្មករ កម្មការិនីនិងអ្នកពាក់ព័ន្ធទាំងអស់ ត្រូវយកទុកដាក់ក្នុងការថែរក្សាការពារអាយុជីវិត ជាពិសេសដល់ក្រុមគ្រួសារខ្លួននិងអ្នកដទៃដែលជាអ្នកប្រើប្រាស់ផ្លូវគ្រប់ៗគ្នា តាមរយៈការចូលរួមលើកកម្ពស់សុវត្ថិភាពចរាចរណ៍ ដោយអនុវត្តច្បាប់សំដៅការបង្ការនិងទប់ស្កាត់គ្រោះថ្នាក់ចរាចរណ៍ឲ្យបានជាអតិបរមា។
លោក ក៏បានក្រើនរំលឹកទៅដល់កងកម្លាំងប្រដាប់អាវុធទាំងអស់ ត្រូវធ្វើជាគំរូល្អទៅដល់ប្រជាពលរដ្ឋ ក្នុងការគោរពអនុវត្តច្បាប់ចរាចរណ៍ផ្លូវគោក ព្រោះកងកម្លាំងជាតួអង្គក្នុងការអនុវត្តច្បាប់ ជាអ្នកចាប់ផាកពិន័យផងដែរ ៕
ដោយ៖ សុថាន
