សារព័ត៌មាន នគរវត្ត តែងតែនាំមុខគេជានិច្ច
រុស្ស៊ីបានដាក់ពង្រាយ UAVs ចំនួន ២៧៣ គ្រឿងប្រឆាំងនឹងអ៊ុយក្រែន ដែលជាចំនួនមិនធ្លាប់មានពីមុនមក គោលដៅមួយក្នុងចំណោមគោលដៅដែលគេសង្ស័យគឺជាមូលដ្ឋាននៃក្រុមយន្តហោះចម្បាំង F-16 ។
បញ្ជាការកងទ័ពអាកាសរបស់ប្រទេសអ៊ុយក្រែនបាននិយាយនៅថ្ងៃនេះថា រុស្ស៊ីបានវាយប្រហារប្រទេសនេះជាមួយនឹងយន្តហោះគ្មានមនុស្សបើកអត្តឃាតរយៈចម្ងាយឆ្ងាយ Geran-2 ចំនួន 273 គ្រឿង និងយន្តហោះបោកបញ្ឆោតប្រព័ន្ធការពារ។ ទីភ្នាក់ងារសារព័ត៌មាន Reuters បាននិយាយថា នេះគឺជាចំនួន UAV ដ៏ធំបំផុតដែលរុស្ស៊ីបានដាក់ពង្រាយក្នុងការវាយប្រហារមួយចាប់តាំងពីការចាប់ផ្តើមនៃជម្លោះ ដោយលើសពី 267 នៅក្នុងការវាយឆ្មក់ដ៏កាចសាហាវកាលពីចុងខែកុម្ភៈ។
បញ្ជាការដ្ឋានទ័ពអាកាសអ៊ុយក្រែនបាននិយាយថា “អង្គភាពការពារដែនអាកាសបានបាញ់ទម្លាក់យន្តហោះគ្មានមនុស្សបើកអត្តឃាតចំនួន 88 គ្រឿង ខណៈដែលយន្តហោះបំបាំងកាយចំនួន 128 គ្រឿងបានវង្វេងដោយមិនបង្កឱ្យមានផលវិបាកអវិជ្ជមាន។ ការវាយប្រហារនេះបានប៉ះពាល់ដល់ខេត្ត Kiev, Dnipro និង Donetsk” ប៉ុន្តែមិនបាននិយាយអំពីយន្តហោះគ្មានមនុស្សបើកអត្តឃាតដែលនៅសល់ចំនួន 57 គ្រឿង នោះទេ។
មន្ត្រីអ៊ុយក្រែននិយាយថា មនុស្សម្នាក់បានស្លាប់ និងបីនាក់ទៀតរងរបួសក្នុងការវាយឆ្មក់មួយលើទីក្រុងគៀវ។
គណនីរបស់ Fighter Bomber របស់អ្នកបើកយន្តហោះចម្បាំងរុស្ស៊ីម្នាក់បាននិយាយថា គោលដៅមួយនៃការវាយប្រហារគឺអាកាសយានដ្ឋានយោធា Vasilkov ក្នុងខេត្ត Kiev ។ នេះគឺជាមូលដ្ឋានសំខាន់របស់កងទ័ពអាកាសអ៊ុយក្រែន ហើយត្រូវបានគេជឿថាជាកន្លែងមួយ ក្នុងចំណោមក្រុម F-16 ផងដែរ។
គណនី Iznanka នៅលើ Telegram ដែលមានទំនាក់ទំនងជាមួយក្រសួងការពារជាតិរុស្ស៊ីបាននិយាយថា “អ្នកស្រុកបានរាយការណ៍ថាភ្លើងដ៏ធំមួយបានឆាបឆេះអស់រយៈពេលជាច្រើនម៉ោងនៅក្នុងតំបន់។ ទិន្នន័យផ្កាយរណបរបស់ NASA ក៏បានបង្ហាញពីប្រភពកម្តៅដ៏ធំមួយនៅឯចំណតយន្តហោះនៅព្រលានយន្តហោះ Vasilkov” ។
ការវាយឆ្មក់នេះបានកើតឡើងពីរថ្ងៃបន្ទាប់ពីគណៈប្រតិភូរុស្ស៊ី និងអ៊ុយក្រែនបានជួបពិភាក្សាផ្ទាល់ជាលើកដំបូងក្នុងរយៈពេលបីឆ្នាំ។ មន្ត្រីរុស្ស៊ីបាននិយាយថា ប្រទេសនេះពេញចិត្តនឹងលទ្ធផលនេះ ហើយបានត្រៀមខ្លួនរួចជាស្រេចដើម្បីបន្តកិច្ចពិភាក្សាជាមួយអ៊ុយក្រែន ដោយបន្ថែមថា ភាគីទាំងពីរបានយល់ព្រមផ្លាស់ប្តូរអ្នកទោសចំនួន 1,000 នាក់ក្នុងរយៈពេលប៉ុន្មានថ្ងៃខាងមុខនេះ៕
ដោយ៖ ធីរីណា(រូបថត៖ Reuters)
