🔥អគ្គិភ័យឆាបឆេះផ្សារពាក់ស្បែកនិងផ្ទះប្រជាពលរដ្ឋអស់ជាច្រើនខ្នង

ខេត្តព្រះវិហារ ៖ ផ្ទះពលរដ្ឋជាច្រើនខ្នង និងតូបជួលឱ្យអាជីវករលក់ដូរជាច្រើនទៀត នៅផ្សារពាក់ស្បែកត្រូវបានអគ្គិភ័យឆាបឆេះអស់ទាំងស្រុងបណ្ដាលឱ្យខូចខាតសម្ភារៈមួយចំនួនធំតែពុំមានរងគ្រោះដល់អាយុជីវិតមនុស្សនោះទេគឺបណ្តាល មកពីទុស្សេខ្សែភ្លើង ។

ហេតុការណ៍អគ្គិភ័យឆាបឆេះផ្សារពាក់ស្បែកនោះនៅវេលាម៉ោង២០និង៣០នាទីយប់ថ្ងៃទី២០ ខែឧសភា ឆ្នាំ២០២៥ត្រង់ចំណុចនៅទល់មុខកងពលធំលេខ៣ ស្ថិតនៅភូមិពាក់ស្បែក ឃុំរំដោះស្រែ ស្រុកជាំក្សាន្ត ខេត្តព្រះវិហារ។

តាមប្រភពបានឱ្យដឹងថា អគ្គិភ័យឆាប់ឆេះនោះបណ្ដាលឱ្យផ្ទះពលរដ្ឋចំនួន៨ខ្នងមាន ១៥បន្ទប់ និងតូបជួល១៦តូបខូចខាតសម្ភារៈមួយចំនួនធំផងដែរតែពុំមានរងគ្រោះដល់អាយុជីវិតមនុស្សនោះទេ។

លោក ចិន ខន្តី អភិបាលស្រុក ជាំក្សាន្តបានប្រាប់ក្រុមអ្នកយកព័ត៌មានឱ្យដឹងថា ក្នុងហេតុការណ៍គ្រោះអគ្គិភ័យនោះ យើងបានប្រើប្រាស់រថយន្តចំនួន៣គ្រឿង រថយន្តពន្លត់អគ្គិភ័យអធិការដ្ឋាននគរបាលស្រុកជាំក្សាន្ត, រថយន្តពន្លត់អគ្គិភ័យរបស់អង្គរក្ស, រថយន្តទឹកកងពលធំលេខ៣ទៀតផង។

 ហើយស្ថានការណ៍អាចគ្រប់គងបានទាំងស្រុងនៅវេលាម៉ោង ២១និង៤០នាទីយប់ថ្ងៃខែដដែល។

លោកអភិបាលស្រុក បញ្ជាក់ថា មូលហេតុដែលបណ្តាលឲ្យឆេះ គឺ មកពីទុស្សេខ្សែភ្លើង ។

ហើយលោកអភិបាលស្រុក ក៏បានផ្តាំផ្ញើរនិងសំណូមពរដល់ពលរដ្ឋទាំងអស់ មេត្តាប្រុងប្រយ័ត្នឱ្យបានខ្ពស់ ចំពោះភ្លើងទៀន ធូប និងបញ្ហាខ្សែភ្លើង ត្រូវតឱ្យសមស្របតាមបច្ចេកទេសត្រឹមត្រូវផងដែរ ៕

ដោយ ៖ ជីវ័ន្ត