សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ នៅព្រឹកថ្ងៃអង្គារ ៨កើត ខែជេស្ឋ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៣ ខែមិថុនា ឆ្នាំ២០២៥ មានករណីរថយន្តដឹកប្រេងឡើងចំណោតមិនរួចក៏បានរអិលថយក្រោយលើផ្លូវជាតិលេខ៤ ចំណោតលោកយាយម៉ៅពេជ្រនិល ចន្លោះគីឡូម៉ែត្រលេខ១០២-១០៣ ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
តាមការបញ្ជាក់ពីលោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួចឱ្យដឹងថា មានករណីរថយន្តដឹកប្រេងឥន្ធនៈ១គ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខភ្នំពេញ3G-9568 សណ្តោសឺមីរ៉ឺម៉ក ពាក់ផ្លាកលេខភ្នំពេញ4B-7338 បើកបរដោយឈ្មោះ ម៉ី ចន្ថន ភេទប្រុស អាយុ៤០ឆ្នាំ រស់នៅភូមិធ្មល់ សង្កាត់ចេក ក្រុងស្វាយរៀង ខេត្តស្វាយរៀង (រថយន្ត ផ្ទុកប្រេងឥន្ធនៈប្រភេទសាំង ចំណុះ ៣២, ០០០លីត្រ) ជួបបញ្ហាបច្ចេកទេសនៅចំណុចឡេីងចំណោតលោកយាយម៉ៅ។
រថយន្ដបើកបរមកពីទិសខាងលិចទៅទិសខាងកើត លុះមកដល់ចំណុចឡើងចំណោតលោកយាយម៉ៅពេជ្រនិល រថយន្តអស់កម្លាំងឡេីងមិនរួច បានរអិលថយក្រោយធ្លាក់ផ្លូវបណ្ដាលឲ្យខូចខាតរថយន្តស្រាល សំណាងល្អពុំមានមនុស្សណាម្នាក់បានរងរបួសឡេីយ ។
ក្រោយកើតហេតុ កម្លាំងនគរបាល នៃអធិការដ្ឋាននគរបាលស្រុកភ្នំស្រួច និងកម្លាំងនគរបាលចរាចរណ៍ បានជួយ សម្របសម្រួលចរាចរណ៍នៅគោលដៅកេីតហេតុ។ ដូច្នេះសូមបងប្អូនពលរដ្ឋអ្នកធ្វើដំណើរមេត្ដាជ្រាប ៕
ដោយ៖ សូរិយា
