សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ពលករខ្មែរ រាប់រយនាក់កំពុងជាប់គាំង នៅច្រកទ្វារខ្លងលឹក ស្រុកអារ័ញ្ញ ខេត្តស្រះកែវ កំពុងប្រឈម និងច្រកទ្វារព្រំដែនអន្តជាតិប៉ោយប៉ែត ក្រុងប៉ោយប៉ែត នៅល្ងាចថ្ងៃទី២៥ ខែមិថុនា ឆ្នាំ២០២៥នេះ។
មន្ត្រីច្រកទ្វារខាងលើបញ្ជាក់ថា៖ ចំពោះពលករខ្មែរដែលជាប់គាំងនៅខាងភាគីថៃនោះ គឺពួកគាត់បានធ្វើដំណើរពីប្រទេសថៃដែលនៅខេត្តឆ្ងាយៗ ដើម្បីចូលមកកម្ពុជាវិញ ប៉ុន្តែមិនទាន់ពេលវេលា ខណៈភាគីថៃបិទដោយឯកតោភាគី ណាមួយទៀតពេលវេលាដែលភាគីថៃបើកមានរយៈពេល៣ម៉ោងទៀតទើបធ្វើដំណើរមិនទាន់សភាពការណ៍។
មន្ត្រីខាងលើបន្តថា ករណីនេះខាងភាគីថៃដូចជាមិនបានជូនដំណឹងដល់ភាគីកម្ពុជាស្ដីពីការបើកច្រកដើម្បីឱ្យដំណើរការទៀតឡើយ។ បើសិនជាបើកដំណើរការច្រកទ្វារព្រះដែនឱ្យពលករខ្មែរចូលមកកម្ពុជា យើងខាងកម្ពុជាក៏បើកឲ្យពលរដ្ឋថៃទៅប្រទេសគេដូចគ្នា ព្រោះពលរដ្ឋថៃក៏មានច្រើនដែរ ដែលពួកគាត់នៅធ្វើការរកស៊ីក្នុងក្រុងប៉ោយប៉ែតចេញដំណើរមិនទាន់ពេលដូចគ្នា។
លោក ញឹម ភឿង អភិបាលរងក្រុងប៉ោយប៉ែត បានឱ្យដឹងតាមទូរស័ព្ទនៅថ្ងៃដដែលនេះថា លោកបានទទួលដំណឹងតាំងព្រឹកមកម្ល៉េះ តែលោកទំនាក់ទំនងទៅខាងភាគីថៃដែរ តែគ្មានការឆ្លើយតបមក រហូតទល់ហ្នឹងល្ងាចនេះ បើទោះលោកខំព្យាយាមទំនាក់ទំនងក៏អត់ពន្លឺសម្រាប់ពលករខ្មែរយើងល្ងាចនេះ ។ លោកបន្តយើងរង់ចាំមើលនៅថ្ងៃទី២៦ ខែមិថុនា ឆ្នាំ២០២៥ ប្រហែលជាអាចនិងមានដំណឹងល្អសំរាប់ពលករខ្មែរយើង។
ដោយឡែកចំពោះពលករខ្មែរធ្វើការខុសច្បាប់នៅស្រុកថៃ ដែលខាងភាគីថៃចាប់បញ្ជូនមកចំនួន១០០នាក់នៅថ្ងៃនេះ អាជ្ញាធរយើងបានយកចិត្តទុកដាក់រកការងារឱ្យគាត់ធ្វើនិងបញ្ជូនពួកគាត់តាមរថយន្តទៅស្រុកកំណើតរៀងៗខ្លួន៕
ដោយ៖ វណ្ណា
