សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ បុរសម្នាក់ខ្ចីម៉ូតូគេទៅ បញ្ចាំយកលុយទៅផឹកស៊ីច្រៀងខារ៉ាអូខេ ត្រូវបានសមត្ថកិច្ចឃាត់ខ្លួនបញ្ជូនទៅ
តុលាការដើម្បីចាត់ការតាមនីតិវិធីកាលពីថ្ងៃទី១៩ ខែកញ្ញា ឆ្នាំ២០១៦ នៅចំណុចភូមិ ត្រពាំងពោធិ៍ ឃុំវល្លិស ស្រុកសំរោងទង ខេត្តកំពង់ស្ពឺ។
មន្ត្រីនគរបាលបានឲ្យដឹងថា ជនសង្ស័យ ដែលសមត្ថកិច្ចឃាត់ខ្លួនឈ្មោះ ចាន់ វ៉ាន់ដា អាយុ២៨ឆ្នាំ រស់នៅភូមិត្រពាំងពោធិ៍ ឃុំវល្លិស ស្រុកសំរោងទង ខេត្តកំពង់ស្ពឺ។
មន្ត្រីដដែលបានបញ្ជាក់ថា ជនសង្ស័យបានលួចយកម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1FB-9989 របស់ឈ្មោះ សំ រដ្ឋា ភេទប្រុស អាយុ២៦ឆ្នាំ រស់នៅភូមិស្វាយកាំបិត ឃុំ ពាម ស្រុកសាមគ្គីមានជ័យ ខេត្តកំពង់ ឆ្នាំងរួចយកទៅបញ្ចាំ។
មន្ត្រីខាងលើបានឲ្យដឹងទៀតថា នៅមុនពេលកើតហេតុជនសង្ស័យបានខ្ចីយកម៉ូតូជនរងគ្រោះជិះមកកាន់ស្រុកកំណើត (ខេត្តកំពង់ស្ពឺ) តែជនសង្ស័យមិនជិះម៉ូតូទៅខេត្តកំពង់ឆ្នាំងវិញទេគឺជិះមកដាក់បញ្ចាំនៅហាងផឹកស៊ីយីហោលីធី ស្ថិតនៅ ភូមិរំលោងប្រឃ្លះ សង្កាត់សុព័រទេព ក្រុងច្បារមន ខេត្តកំពង់ស្ពឺក្នុងតម្លៃ២៥០ដុល្លារតាំងពីថ្ងៃទី១៨ ខែកញ្ញា ឆ្នាំ២០១៦មកម្លេ៉ះ ។ ក្រោយមកជនរងគ្រោះបានប្តឹងសមត្ថកិច្ចឲ្យជួយអន្តរាគមន៍ទើបសមត្ថកិច្ចបានស្រាវជ្រាវរហូតឈានដល់ឃាត់ខ្លួនជនសង្ស័យនៅកន្លែងកើតហេតុខាងលើតែម្តង។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលក្រុងច្បារមនដើម្បីកសាងសំណុំរឿងបញ្ជូនសាលាដំបូងខេត្តកំពង់ស្ពឺចាត់ការតាមផ្លូវច្បាប់៕ សេនាស័ក្តិ
