សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារសៀលថ្ងៃចន្ទ ៧រោច ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី០៩ ខែកុម្ភៈ ឆ្នាំ២០២៦ លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ និងជាប្រធានគណៈបញ្ជាការឯកភាពរដ្ឋបាលខណ្ឌ បានដឹកនាំកិច្ចប្រជុំគណ:បញ្ជាការឯកភាពរដ្ឋបាលខណ្ឌ ស្ដីពីការបន្តពង្រឹងការអនុវត្តអនុក្រឹត្យលេខ០៣អនក្រ.បក ស្តីពីការគ្រប់គ្រងសន្ដិសុខសុវត្ថិភាព តាមទីតាំងរស់នៅប្រមូលផ្តុំ និងបទបញ្ជាលេខ០១ បប របស់រាជរដ្ឋាភិបាល ស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) ក្នុងមូលដ្ឋានខណ្ឌពោធិ៍សែនជ័យ រាជធានីភ្នំពេញ។
ក្នុងកិច្ចប្រជុំនោះដោយផ្តោតលើចំណុចគន្លឹះចំនួន៣៖
១. ការអនុវត្តអនុក្រឹត្យលេខ ០៣ អនក្រ.បក
គោលបំណង៖ ពង្រឹងការគ្រប់គ្រងសន្តិសុខ និងសុវត្ថិភាពនៅតាមទីតាំងរស់នៅប្រមូលផ្តុំ (ដូចជា ខុនដូ អាផាតមិន និងបុរីនានា)
សកម្មភាពចម្បង៖ លោកអភិបាលបានជម្រុញឱ្យកម្លាំងសមត្ថកិច្ច និងអាជ្ញាធរពាក់ព័ន្ធ ត្រូវក្តាប់ឱ្យបានច្បាស់នូវស្ថិតិអ្នកស្នាក់នៅ និងសកម្មភាពផ្សេងៗក្នុងទីតាំងប្រមូលផ្តុំ ដើម្បីបង្ការកុំឱ្យមានការលាក់ខ្លួននៃក្រុមជនល្មើស ឬការប្រើប្រាស់ទីតាំងទាំងនោះសម្រាប់សកម្មភាពខុសច្បាប់។
២. ការអនុវត្តបទបញ្ជាលេខ ០១ បប (ការបង្ក្រាប Online Scams)
គោលដៅ៖ បោសសម្អាតការឆបោកតាមប្រព័ន្ធបច្ចេកវិទ្យា និងល្បែងស៊ីសងតាមប្រព័ន្ធអនឡាញ វិធានការដាច់ខាត៖ លោកបានដាក់បទបញ្ជាឱ្យមានការតាមដាន និងបង្ក្រាបឱ្យទាន់ពេលវេលានូវរាល់ទីតាំងដែលសង្ស័យថាមានបង្កប់សកម្មភាព Online Scams ឬការជួញដូរមនុស្សដែលពាក់ព័ន្ធនឹងបច្ចេកវិទ្យា។
និង ៣. ការងារអាទិភាពផ្សេងៗ
ក្រៅពីការងារខាងលើ លោកអភិបាលក៏បានសង្កត់ធ្ងន់លើ៖ ការបង្ក្រាបក្មេងទំនើង និងការជួញដូរគ្រឿងញៀន។
ការត្រួតពិនិត្យជាតិអាល់កុល និងការរឹតបន្តឹងច្បាប់ចរាចរណ៍។ ការផ្តល់សេវាសាធារណៈជូនប្រជាពលរដ្ឋឱ្យបានលឿន និងមានប្រសិទ្ធភាព។
កិច្ចប្រជុំនេះបង្ហាញពីការប្តេជ្ញាចិត្តខ្ពស់របស់រដ្ឋបាលខណ្ឌពោធិ៍សែនជ័យ ក្នុងការការពារសុវត្ថិភាពជូនប្រជាពលរដ្ឋ និងការអនុវត្តតាមបទបញ្ជារបស់ថ្នាក់ដឹកនាំជាតិឱ្យបានខ្ជាប់ខ្ជួន៕
ដោយ៖ចន្ទ លីហ្សា
