សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ គ្រោះថ្នាក់ចរាចរណ៍មួយ បានកើតឡើង បណ្ដាលឲ្យពីរនាក់ប្ដីប្រពន្ធមួយរងរបួសធ្ងន់ និងស្រាល ដោយសាររថយន្ដក្រុមហ៊ុនទូរស័ព្ទស្មាត បើកបរក្នុងល្បឿនលឿ ជ្រុលបុកម៉ូតូរម៉ក ខណៈជនរងគ្រោះបើកដឹកឥវ៉ាន់ចេញខេត្តសៀមរាប តាមបណ្តោយផ្លូវជាតិលេខ៦ ឆ្ពោះទៅផ្ទះនៅខេត្តបាត់ដំបងវិញ ។
ហេតុការណ៍គ្រោះថ្នាក់ចរាចរនេះ បានកើតឡើងកាលពីវេលាម៉ោង១៨ និង២៥នាទីល្ងាច ថ្ងៃទី១២ ខែតុលា ឆ្នាំ២០១៦ស្ថិតនៅចំណុចខាងកើតស្ពានតាមេងចំងាយ២៥០ម៉ែត្រនៅលើផ្លូវជាតិលេខ៦ ក្នុងស្រុកក្រឡាញ់ ខេត្ដសៀមរាប ។
លោកវរសេនីយ៍ត្រី ជី បេងជនអធិការនគរបាលស្តីទីស្រុកក្រឡាញ់បានឱ្យដឹងនៅថ្ងៃទី១៣ ខែតុលា ឆ្នាំ២០១៦ថា ករណីគ្រោះថ្នាក់ចរាចរណ៍ខាងលើនេះ បណ្តាលមកពីរថយន្តម៉ាក ម៊ីស៊ី មីស៊ុយ ពណ៌ខ្មៅពាក់ស្លាកលេខ ភំពេញ ២T:៣៦៩៣ បើកក្នុងទិសដៅពីកើតទៅលិច ក្នុងល្បឿនលឿន ហើយបានជ្រុលទៅបុកម៉ូតូសណ្ដោងរ៉ឺម៉កចំពីក្រោយពេញទំហឹង បណ្ដាលឱ្យអ្នកបើកបរម៉ូតូទាំង២នាក់ប្តីប្រពន្ធរងរបួសធ្ងន់ និងស្រាល ហើយត្រូវបានបញ្ជូនទៅជួយសង្គ្រោះព្យាបាលភ្លាមៗនៅមន្ទីរពេទ្យបង្កែកស្រុកក្រឡាញ់ ។
ចំពោះអ្នកបើកបររថយន្តក្រោយពេលបង្ករហេតុ បានចុះរត់គេចខ្លួនបាត់ស្រម៉ោលបន្យល់ទុករថយន្តនៅកន្លែងកើតហេតុ ។
លោកបានបញ្ជាក់បន្ថែមថា ជនរងគ្រោះទាំង២នាក់ប្តីប្រពន្ធមានឈ្មោះ ប្រាក់លាង ភេទប្រុស អាយុ៥៤ឆ្នាំ ជាអ្នកបើកបរម៉ូតូ សណ្ដោយរ៉ឺម៉ក(របួសត្រង់ក្បាលនិងឆ្អឹងខ្នង ធ្ងន់ )និងប្រពន្ធ ឈ្មោះ ខាំ សំបូរ អាយុ៥២ឆ្នាំ (របួសស្រាល) មានទីលំនៅភូមិតាមាឃឃុំគោកឃ្មុំ ស្រុកថ្មគោល ខេត្តបាត់ដំបង បើកបរមកពីទិសខាងកើត ទៅលិច ស្របគ្នាជាមួយរថយន្ត ។
លោកបានបញ្ជាក់ទៀតថា ក្រោយពីកើតហេតុភ្លាមៗ កម្លាំងអធិការដ្ឋាននគរបាលស្រុកបានចុះទៅត្រួតពិនិត្យ និងវាស់វែងរួចបានយករថយន្ត និងម៉ូតូមករក្សាទុកនៅអធិការដ្ឋាននគរបាលស្រុកដើម្បីរៀបចំសំណុំរឿងតាមនីតិវិធីច្បាប់ ។
បច្ចុប្បន្ន អ្នកបើកបរសមត្ថកិច្ចកំពុងស្រាវជ្រាវយកមកផ្តន្ទាទោសតាមផ្លូវច្បាប់ ៕ ជានិរន្ដរ៍
