សារព័ត៌មាន នគរវត្ត តែងតែនាំមុខគេជានិច្ច
អុីរ៉ង់បានចេញការព្រមានយ៉ាងម៉ឺងម៉ាត់ដល់សហរដ្ឋអាមេរិកបន្ទាប់ពីការវាយប្រហារលើសាកលវិទ្យាល័យនានារបស់អុីរ៉ង់។
កងកម្លាំងឆ្មាំបដិវត្តន៍អ៊ិស្លាមអុីរ៉ង់ (IRGC) បានកំណត់ថ្ងៃផុតកំណត់នៅម៉ោង ១២ ថ្ងៃត្រង់ ម៉ោងនៅទីក្រុងតេអេរ៉ង់ នៅថ្ងៃទី ៣០ ខែមីនា សម្រាប់សហរដ្ឋអាមេរិកក្នុងការចេញសេចក្តីថ្លែងការណ៍ជាផ្លូវការថ្កោលទោសការវាយប្រហារលើសាកលវិទ្យាល័យអុីរ៉ង់ រួមទាំងការវាយប្រហារចុងក្រោយបំផុតលើសាកលវិទ្យាល័យបច្ចេកវិទ្យា Isfahan និងសាកលវិទ្យាល័យវិទ្យាសាស្ត្រ និងបច្ចេកវិទ្យាទីក្រុងតេអេរ៉ង់។
IRGC បានព្រមានថា ប្រសិនបើទីក្រុងវ៉ាស៊ីនតោនមិនគោរពតាមការទាមទាររបស់អុីរ៉ង់ទេ សាកលវិទ្យាល័យពីរបន្ថែមទៀតនឹងត្រូវកំណត់គោលដៅជាការសងសឹក ប៉ុន្តែមិនបានប្រាប់ឈ្មោះពួកគេទេ។
IRGC បានណែនាំបុគ្គលិក សាស្ត្រាចារ្យ និស្សិត និងអ្នកស្រុកទាំងអស់ក្នុងរង្វង់ ១ គីឡូម៉ែត្រពីសាកលវិទ្យាល័យណាមួយដែលមានទំនាក់ទំនងជាមួយសហរដ្ឋអាមេរិក ឬអុីស្រាអែល ឱ្យជម្លៀសចេញពីតំបន់នោះដើម្បីសុវត្ថិភាព។
IRGC ក៏បានព្រមានផងដែរថា ប្រសិនបើសហរដ្ឋអាមេរិកចង់ទប់ស្កាត់ការវាយប្រហារសងសឹកបន្ថែមទៀតលើសពីសាកលវិទ្យាល័យទាំងពីរដែលទីក្រុងតេអេរ៉ង់បានកំណត់គោលដៅ ទីក្រុងវ៉ាស៊ីនតោនត្រូវតែចាត់វិធានការ ក្រោយការវាយប្រហារលើសាកលវិទ្យាល័យ និងមជ្ឈមណ្ឌលស្រាវជ្រាវអុីរ៉ង់។ IRGC បានសង្កត់ធ្ងន់«បើមិនដូច្នោះទេ ការគំរាមកំហែងនៅតែមានប្រសិទ្ធភាព ហើយនឹងត្រូវអនុវត្ត»។
មុននេះ IRGC បានប្រកាសថា ខ្លួនចាត់ទុកសាកលវិទ្យាល័យអាមេរិក និងអុីស្រាអែលនៅមជ្ឈិមបូព៌ាជាគោលដៅស្របច្បាប់សម្រាប់ការសងសឹកប្រឆាំងនឹងការវាយប្រហារជាបន្តបន្ទាប់លើស្ថាប័នអប់រំអុីរ៉ង់។
ការព្រមាននេះបានកើតឡើងបន្ទាប់ពី IRGC បានថ្កោលទោសការទម្លាក់គ្រាប់បែកជាបន្តបន្ទាប់ដោយសហរដ្ឋអាមេរិក និងអុីស្រាអែលដែលកំណត់គោលដៅលើសាកលវិទ្យាល័យអុីរ៉ង់។
IRGC បានបញ្ជាក់ថា «អ្នកដែលមានអំណាចនៅសេតវិមានគួរតែដឹងថា ចាប់ពីពេលនេះតទៅ សាកលវិទ្យាល័យអុីស្រាអែលទាំងអស់ និងសាកលវិទ្យាល័យអាមេរិកនៅក្នុងតំបន់អាស៊ីខាងលិចគឺជាគោលដៅស្របច្បាប់សម្រាប់យើង រហូតដល់សាកលវិទ្យាល័យទាំងពីរដែលត្រូវបានវាយប្រហារដើម្បីសងសឹកចំពោះសាកលវិទ្យាល័យអុីរ៉ង់ត្រូវបានបំផ្លាញ»៕
ដោយ៖ធីរីណា
