សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ សារព័ត៌មាន AFP បានផ្សាយថា មន្ត្រីជាន់ខ្ពស់អាមេរិកម្នាក់បានឱ្យដឹងកាលពីថ្ងៃព្រហស្បតិ៍ ទី២៣ ខែមេសា ឆ្នាំ២០២៦ថា សហរដ្ឋអាមេរិកនឹងអញ្ជើញប្រធានាធិបតីរុស្ស៉ី លោក វ្ល៉ាឌីមៀរ ពូទីន ចូលរួមក្នុងកិច្ចប្រជុំកំពូល G20 ក្នុងទីក្រុង Miami ប៉ុន្តែលោកប្រធានាធិបតី ដូណាល់ ត្រាំ បាននិយាយថា រូបលោកផ្ទាល់មិនប្រាកដឡើយថាលោកពូទីន នឹងអញ្ជើញចូលរួមឬក៏អត់។
ការអញ្ជើញនេះអាចនឹងក្លាយជាការបន្ធូរបន្ថយសម្ពាធអន្តរជាតិដ៏ធំមួយលើលោក ពូទីន ដែលត្រូវបានមេដឹកនាំលោកខាងលិចមួយចំនួនធំមិនអើពើ លើកលែងតែលោក ត្រាំ ចាប់តាំងពីរុស្ស៉ីបើកធ្វើសង្រ្គាមលុកលុយចូលអ៊ុយក្រែនកាលពីឆ្នាំ២០២២មក។ សហរដ្ឋអាមេរិកក្នុងឆ្នាំ២០២៦នេះគឺជាម្ចាស់ផ្ទះរៀបចំកិច្ចប្រជុំកំពូល G20 ដែលនឹងប្រព្រឹត្តទៅខែធ្នូខាងមុខក្នុងទីក្រុង Miami រដ្ឋ Florida។
មន្ត្រីជាន់ខ្ពស់ម្នាក់នៃរដ្ឋបាលលោកត្រាំ បានគូសបញ្ជាក់ក្នុងសេចក្ដីថ្លែងការណ៍មួយថា «គ្រប់សមាជិក G20 ទាំងអស់នឹងទទួលបានការអញ្ជើញឱ្យចូលរួមកិច្ចប្រជុំ កម្រិតរដ្ឋមន្ត្រី និងកិច្ចប្រជុំកំពូលរបស់មេដឹកនាំ»។ នៅពេលត្រូវបានសាកសួរដោយអ្នកសារព័ត៌មានម្នាក់ជុំវិញការអញ្ជើញលោក ពូទីន លោក ត្រាំ បានឆ្លើយថាលោកមិនប្រាកដនោះទេថាលោក ពូទីន នឹងអញ្ជើញចូលរួមឬក៏អត់? ប៉ុន្តែលោក ត្រាំបានបញ្ជាក់ថា លោកគាំទ្រការអញ្ជើញលោក ពូទីន ហើយវាជារឿងល្អប្រសិនបើមេដឹកនាំរុស្ស៉ីពិតជាអញ្ជើញចូលរួមមែននោះ។ លោក ពូទីន បានខកខានចូលរួមកិច្ចប្រជុំកំពូល G20 ចាប់តាំងពីឆ្នាំ២០១៩ ដោយដំបូងឡើយការខកខាននេះបណ្ដាលមកពីវិបត្តិកូវីដ១៩ និងក្រោយមកដោយសារតែ សង្រ្គាមអ៊ុយក្រែន៕
