សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លាភធំចំនួនបានរំកិលខិតមកកាន់តែគៀក ក្រុមកីឡាករបាល់ទាត់ជម្រើសជាតិកម្ពុជា ហើយ ក្រោយពីទទួលជ័យចំនួន២ប្រកួតជាប់គ្នា ក្នុងនោះកាលពីថ្ងៃទី១៥ ខែតុលា កម្ពុជាលេងឈ្នះ ក្រុមជម្រើសជាតិឡាវ២ទល់១ និងយប់ថ្ងៃទី១៨ ខែតុលា ឆ្នាំ២០១៦ ពួកគេបន្តលេងឈ្នះលើក្រុមជម្រើសជាតិព្រុយណេ(Brunei Darussalam) ក្នុងលទ្ធផល៣ទល់សូន្យ ខណៈដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រកាសជាថ្មីថា ប្រសិនបើក្រុមជម្រើសជាតិកម្ពុជាអាចលេងឈ្នះក្រុមទីម័រខាងកើតមួយប្រកួតទៀត សម្តេចនិងឧបត្ថម្ភថវិកាចំនួន៥ម៉ឺនដុល្លារ នេះគឺជាលាភធំៗ ដែលកើតឡើងក្នុងពេលតែមួយរបស់ក្រុមជម្រើជាតិកម្ពុជា។
គួរបញ្ជាក់ថា ការប្រកួតក្នុងវគ្គទី១ក្រុមជម្រើសជាតិកម្ពុជាបាននាំមុខក្រុមជម្រើសជាតិប៊្រុយណេលទ្ធផលបច្ចេកទេស៣-០ខណៈ៣គ្រាប់បាល់ទី១របស់កម្ពុជារកបានដោយកីឡាករខ្សែបម្រើប្រយុទ្ធ ប្រាក់ មុន្នីឧត្តមចំនួន២គ្រាប់ដោយការលើកបាល់ជ្រុងនៅនាទីទី៦ និងនាទី៤២ ដោយឡែក១គ្រាប់ទៀតរកបានដោយកីឡាករខ្សែប្រយុទ្ធ កែវ សុខផេង នៅនាទីទី៩ ក្រោយប្រាក់ មុន្នីឧត្តមធ្វើបានសម្រេចតែ៣នាទីប៉ុណ្ណោះ។
ជាការឆ្លើយតបវិញភ្លាមៗដែរ ចំពោះក្រុមប៊្រុយណេក៏បានព្យាយាមដាក់សំពៀតតាមរយៈការវាយបកសម្រុកខ្លាំងមកលើកម្ពុជា ប៉ុន្តែធ្វើមិនបានល្អព្រោះកម្ពុជាមានទម្រង់លេងល្អតាមការរៀបចំរបស់គ្រូបង្វឹក លោក Lee tae Hoonនិងថ្នាក់ដឹកនាំដ៏ទៀត។ចំពោះការប្រកួតក្នុងវគ្គទី២ ក្រុមប៊្រុយណេនូវតែបន្តព្យាយាមសម្រុកយ៉ាងខ្លាំងក្នុងគោលបំណងស្វែងរកឱកាសទាត់បាល់បំប៉ោងសំណាញ់ទីរបស់ក្រុមកម្ពុជាវិញ ប៉ុន្តែធ្វើមិនសម្រេចម្យ៉ាងវិញទៀតកម្ពុជាក៏មានឱកាសជាច្រើនដើម្បីរកគ្រាប់បាល់បន្ថែម តែធ្វើមិនបានល្អដូចគ្នាព្រោះការប្រកួតស្ថិតនូវក្នុងស្មារតីប្រុងប្រយ័ត្នខ្ពស់។ ចប់ការប្រកួតកម្ពុជារក្សាលទ្ធផលឈ្នះប៊្រុយណេ ៣-០ដោយបច្ចេកទេសដូច្នេះកម្ពុជាមាន៦ពិន្ទុក្នុងដៃហើយ ។ វត្តក្រុមកម្ពុជាចូលលេងក្នុងពូលBក៏កាន់តែមានជំនឿចិត្តខ្ពស់ផងដែរ។
ទន្ទឹមនឹងជ័យជម្នះអាចចាត់បានថា ជាប្រវត្តិសាស្ត្រ នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសរសេរនៅលើហ្វេសប៊ុករបស់សម្តេចថា “ ខ្ញុំសូមអបអរសាទរជោគជ័យនៃក្រុមបាល់ទាត់ជម្រើសជាតិកម្ពុជា (Cambodia) ដែលបានយកឈ្នះលើកីឡាបាល់ទាត់ប្រ៊ុយណេ (Brunei Darussalam) ក្នុងលទ្ធផល៣ទល់សូន្យ ដែលទើបបានបញ្ចប់ មុននេះ បន្តិច”។
សម្តេចបានសរសេរបញ្ជាក់បន្ថែមថា “ ខ្ញុំនឹងផ្តល់ថវិកាឧបត្ថម្ភលើកទឹកចិត្តចំនួន $50,000 (៥ម៉ឺនដុល្លារ) ក្នុងករណីដែលក្រុមជម្រើសជាតិកម្ពុជាយើងយកឈ្នះ១ប្រកួតផ្សេងទៀតគឺ កម្ពុជា ជាមួយ ទីម័ឡេស្តេ (Timor-Leste) អរគុណបងប្អូនជនរួមជាតិ ពិសេសក្មួយៗជាយុវជនដែលបានគាំទ្រដល់វិស័យកីឡាកម្ពុជាយើង” ៕ សារីម
