សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ ករណីរថយន្តធុនធំ១គ្រឿងមានដឹកគ្រែនិងដឹកសម្ភារៈផ្សេងទៀត ធ្វើដំណើរចុះពីលើភ្នំបូកគោ បានបើកធ្លាក់ផ្លូវធ្លាក់ចុះទៅក្រោមប្រហែល ៥០ម៉ែត្រកាលពីវេលាម៉ោង៦ល្ងាចថ្ងៃទី០៩ ខែឧសភា ឆ្នាំ២០២៦។
បន្ទាប់ពីកើតហេតុ មិនអាចយកសពអ្នកបើកបរមកធ្វើបុណ្យបានភ្លាមៗនោះទេដោយសារតែភ្លៀងធ្លាក់ជោកជាំខ្លាំង ពិបាកក្នុងការចុះទៅយក ។ តែដោយសារការអន្ទះសារបស់ក្រុមគ្រួសារសាច់ញាតិជនរងគ្រោះក៏បានជួលក្រុមកម្មករជំនាញចុះទៅកាត់ដែករថយន្តដែលគាបជាប់អ្នកបើកបរ ហើយយកសពចេញមកបាននៅវេលាម៉ោងជិត៤ទៀបភ្លឺឈានចូលថ្ងៃទី១១ ខែឧសភា ឆ្នាំ២០២៦។
ជនរងគ្រោះឈ្មោះព្រំ ចាន់ថន ភេទប្រុស អាយុ៤២ឆ្នាំ ជាអ្នកបើកបររថយន្ត រស់នៅភូមិកោះម៉ាក់ប្រាំង ឃុំបឹងសាលាខាងជើង ស្រុកកំពង់ត្រាច ខេត្តកំពត។ រថយន្តធុនធំមួយគ្រឿងដែលជួបគ្រោះថ្នាក់ខាងលើ ពាក់ស្លាកលេខ ភ្នំពេញ 3C-1231 ។
សពត្រូវបានរៀបចំធ្វើបុណ្យតាមប្រពៃណីនៅឯផ្ទះជនរងគ្រោះក្នុងភូមិកោះម៉ាក់ប្រាំង ។
បច្ចប្បន្ន រថយន្ត១គ្រឿងខាងលើត្រូវបានទុកចោលនៅកន្លែងកើតហេតុនៅភ្នំបូកគោ ចំណែកមូលហេតុនៃគ្រោះថ្នាក់នេះគឺអាចបណ្តាលមកពីរថយន្តដាច់ហ្វ្រ័ងផងក៏មិនដឹង ព្រោះមានការសន្និដ្ឋានខុសៗគ្នា ។ ម្យ៉ាងទៀតអ្នកបើកបរនៅក្នុងរថយន្តនោះមានតែម្នាក់ឯង ៕
ដោយ៖ សូរិយា
