សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចនៃការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ កាលពីថ្ងៃទី១៩ ខែឧសភា ឆ្នាំ២០២៦ បានបញ្ជូនសំណុំរឿងប្តី-ប្រពន្ធ ០២នាក់ ជាជនជាតិស៊ុយអែតទៅសាលាដំបូងរាជធានីភ្នំពេញ ពាក់ព័ន្ធនឹងករណីប្រើអំពើហិង្សា និងធ្វើឲ្យខូច ខាតដោយចេតនា លើទ្រព្យសម្បត្តិអ្នកដទៃ នៅក្នុងផ្សារម៉ាត០១កន្លែង ក្នុងខណ្ឌមានជ័យ រាជធានីភ្នំពេញ ។
ប្តី-ប្រពន្ធជនជាតិស៊ុយអែតតនេះ ប្តីមានឈ្មោះ Christian Oberg អាយុ៤៥ឆ្នាំ , រីឯប្រពន្ធ ឈ្មោះ MALIN TILVING អាយុ៤២ឆ្នាំ ស្នាក់នៅ (ខុនដូជ័រអឺហ្កាឌិន) បន្ទប់លេខ១៨២៥ ភូមិឫស្សី សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។ សមត្ថកិច្ចបានពិនិត្យរកឃើញថា : ប្តី-ប្រពន្ធជនបរទេសទាំង០២នាក់នេះ មានពាក់ព័ន្ធប្រើគ្រឿងញៀន រហូតដល់លើសកម្រិតដែលគេហៅថា បែកថ្នាំ ផងដែរ ។
គួរជម្រាបថា កាលថ្ងៃទី១៥ ខែឧសភា ឆ្នាំ២០២៦ កន្លងទៅ វេលាម៉ោងប្រមាណ ៣:៣០នាទី(រសៀល) កម្លាំងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវនិងឃាត់ខ្លួនជន សង្ស័យ០២នាក់ខាងលើ នៅចំណុចផ្ទះសំណាក់ ០១ កន្លែង ស្ថិតនៅតាមផ្លូវលេខ១៧២សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
ជនបរទេសទាំង០២នាក់នេះ ពាក់ព័ន្ធនឹងករណីធ្វើសកម្មភាពវាយកម្ទេចសម្ភារ ក្នុងផ្សារម៉ាត ០១កន្លែង ស្ថិតនៅផ្លូវលេខ២១៧ ភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យកាលពីវេលាម៉ោង១១:៤២នាទី(យប់) ថ្ងៃទី១៣ ខែឧសភា ឆ្នាំ២០២៦ កន្លងទៅ !។
ការស្រាវជ្រាវឃាត់ខ្លួននេះ ដឹកនាំដោយ លោក ឧត្តម សេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ,លោក ឧត្តមសេនីយ៍ទោ លី ប៊ុនអេង ស្នងការរងទទួលការិយាល័យនគរបាលព្រហ្មទណ្ឌកម្រិតស្រាល និង លោក វរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងនៃអធិការដ្ឋាននគរបាលខណ្ឌមានជ័យ ។
ជនរងគ្រោះពាក់ព័ន្ធនឹងសំណុំរឿងនេះ គឺ ឈ្មោះ អ៊ា ណៃហៀង អាយុ៣៩ឆ្នាំ ជាម្ចាស់ផ្សារអិលអិចម៉ាត ស្នាក់នៅផ្ទះលេខ៩២៥D ផ្លូវលេខ២ ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ៕
ដោយ៖ សូរិយា
