យុវជនជិះម៉ូតូខ្វះការប្រុងប្រយ័ត្នជ្រុលបុកស្ត្រីវ័យចំណាស់ជិះកង់បណ្ដាលឲ្យស្លាប់យ៉ាងគួរឲ្យសង្វេគ

ខេត្តកណ្តាល៖ ស្ត្រីវ័យចំណាស់ម្នាក់បានទទួល មរណភាពយ៉ាងគួរឲ្យសង្វេគនៅពេលបញ្ជូនទៅដល់មន្ទីរពេទ្យ បន្ទាប់ពីត្រូវយុវជនម្នាក់ជិះម៉ូតូខ្វះការប្រុង ប្រយ័ត្នជ្រុលបុកពីក្រោយយ៉ាងពេញទំហឹង ខណៈជនបង្កក៏រងរបួសធ្ងន់ផងដែរ។ គ្រោះថ្នាក់ចរាចរណ៍នេះបានកើតឡើងកាលពីម៉ោង ១២ និង០០នាទីថ្ងៃត្រង់ ថ្ងៃទី២៤ ខែ ឧសភា ២០២៦ នៅលើផ្លូវបេតុងស្ថិតក្នុងភូមិអន្លង់តាសេកលើ ឃុំព្រែកអំបិល ស្រុកស្អាង ខេត្តកណ្ដាល។

ស្ត្រីរងគ្រោះដែលស្លាប់បាត់បង់ជីវិតឈ្មោះ ឈន ហ៊ាង អាយុ ៧៣ឆ្នាំ ជិះកង់។ ចំណែកអ្នកបើកបរម៉ូតូបង្កមានឈ្មោះ ជា ចាន់នី ភេទប្រុស អាយុ ២៥ឆ្នាំ ដោយអ្នកទាំងពីរមានទីលំនៅជាមួយគ្នាក្នុងភូមិឃុំកើតហេតុខាងលើ។

មុនពេលកើតហេតុ យុវជនបង្កបានបើកបរម៉ូតូ ១គ្រឿងម៉ាកស៊ុយហ្ស៊ូគីឡេតពណ៌សលាយខៀវ ពាក់ផ្លាកលេខ ភ្នំពេញ 1AJ 0423 ធ្វើដំណើរក្នុងទិសដៅពីជើងទៅត្បូង។ លុះពេលបើកមកដល់ចំណុចកើតហេតុ ក៏បានជ្រុលទៅបុកស្ត្រីវ័យចំណាស់រងគ្រោះដែលកំពុងជិះកង់ក្នុងទិសដៅស្របគ្នាពីមុខយ៉ាងពេញទំហឹង។ ក្រោយកើតហេតុ កម្លាំងសមត្ថកិច្ចបានចុះអន្តរាគមន៍បញ្ជូនស្ត្រីរងគ្រោះទៅមន្ទីរពេទ្យ តែជាអកុសលដោយរបួសធ្ងន់ធ្ងរពេក ទើបមិនអាចជួយសង្គ្រោះជីវិតបាន។

ក្រោយការចុះពិនិត្យវាស់វែង សពស្ត្រីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកអ្នកជិះម៉ូតូរងរបួសធ្ងន់ត្រូវបានសាច់ញាតិយកទៅមន្ទីរពេទ្យដោយខ្លួនឯង។ ចំពោះវត្ថុតាងកង់និងម៉ូតូដែលរងការខូចខាតស្រាល ត្រូវបានយកមករក្សាទុកនៅអធិការដ្ឋាននគរបាលស្រុកស្អាង ដើម្បីកសាងសំណុំរឿងទៅតាមនីតិវិធីច្បាប់។ ការសន្និដ្ឋានបឋមរបស់សមត្ថកិច្ចជំនាញគឺគ្រោះថ្នាក់នេះបណ្ដាលមកពីអ្នកបើកបរម៉ូតូខ្វះការប្រុងប្រយ័ត្ន និងមានការធ្វេសប្រហែស៕

ដោយ៖ សូរិយា