សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ព្រះនាងបាជរ៉ាគីទីយ៉ាបា (Bajrakitiyabha) នៃប្រទេសថៃ ដែលបានសន្លប់អស់រយៈពេលជាងបីឆ្នាំបន្ទាប់ពីមានជំងឺដាច់សរសៃឈាមខួរក្បាល បានសោយទិវង្គតនៅមន្ទីរពេទ្យជូឡាឡុងកន ក្នុងព្រះជន្ម ៤៧ ព្រះវស្សា។
យោងតាមសេចក្តីថ្លែងការណ៍មួយពីព្រះបរមរាជវាំងថៃ ព្រះនាងបាជរ៉ាគីទីយ៉ាបា បានសោយទិវង្គតនៅម៉ោង ៧:៤៨ យប់ ថ្ងៃទី ១១ ខែមិថុនា នៅមន្ទីរពេទ្យជូឡាឡុងកន ក្នុងទីក្រុងបាងកក។ គ្រួសាររាជវង្សបាននិយាយថា ក្រុមគ្រូពេទ្យបានអនុវត្តការព្យាបាល និងការថែទាំយ៉ាងយកចិត្តទុកដាក់បំផុត ប៉ុន្តែស្ថានភាពរបស់ព្រះនាងនៅតែបន្តកាន់តែអាក្រក់ទៅៗ ដោយសារតែផលវិបាកនៃការឆ្លងមេរោគ។
ព្រះនាងបាជរ៉ាគីទីយ៉ាបា បានទទួលរងនូវជំងឺដាច់សរសៃឈាមខួរក្បាលក្នុងខែធ្នូ ឆ្នាំ ២០២២ ខណៈពេលកំពុងហ្វឹកហាត់សត្វឆ្កែសម្រាប់ការប្រកួតយោធា។ គ្រូពេទ្យបានកំណត់ថាមូលហេតុគឺចង្វាក់បេះដូងលោតញាប់ខ្លាំងដែលបណ្តាលមកពីការឆ្លងមេរោគបេះដូង។ ចាប់តាំងពីពេលនោះមក ព្រះនាងក៏បានសន្លប់។
ការសោយទិវង្គតរបស់ព្រះនាងត្រូវបានចាត់ទុកថាជាការបាត់បង់ដ៏ធំមួយសម្រាប់គ្រួសាររាជវង្សថៃ ដោយសារព្រះនាងគឺជាសមាជិកដ៏មានស្នាដៃបំផុតម្នាក់នៃគ្រួសាររាជវង្ស ហើយធ្លាប់ត្រូវបានគេចាត់ទុកថាជាឥស្សរជនសំខាន់ម្នាក់ក្នុងការស្នងរាជ្យបន្ត។ ប្រសូតនៅថ្ងៃទី 7 ខែធ្នូ ឆ្នាំ 1978 ព្រះនាងបាជរ៉ាគីទីយ៉ាបា គឺជាកូនច្បងក្នុងចំណោមកូនប្រាំពីរនាក់របស់ព្រះបាទមហា វ៉ាជីរ៉ាឡុងកន។ ព្រះនាងជាកូនតែមួយគត់របស់ព្រះអង្គ ជាមួយព្រះនាងសោមសាវ៉ាលី ដែលជាភរិយាដំបូងរបស់ព្រះអង្គ។
ព្រះនាងបាជរ៉ាគីទីយ៉ាបា បានសិក្សាផ្នែកច្បាប់ ដោយទទួលបានសញ្ញាបត្របរិញ្ញាបត្រជាន់ខ្ពស់ពីរពីសាកលវិទ្យាល័យ Cornell នៅសហរដ្ឋអាមេរិក។ បន្ទាប់ពីធ្វើការមួយរយៈពេលខ្លីសម្រាប់បេសកកម្មថៃប្រចាំអង្គការសហប្រជាជាតិនៅទីក្រុងញូវយ៉ក ព្រះនាងបានវិលត្រឡប់មកប្រទេសថៃវិញ ដើម្បីធ្វើការនៅការិយាល័យអគ្គព្រះរាជអាជ្ញានៅទីក្រុងបាងកក និងទីតាំងផ្សេងៗទៀត៕
