សារព័ត៌មាន នគរវត្ត តែងតែនាំមុខគេជានិច្ច
អ៊ីរ៉ាក់បានដាក់ពង្រាយរថក្រោះ រថយន្តពាសដែក និងកងកម្លាំងពិសេស ក្នុងការវាយឆ្មក់មួយលើតំបន់ដែលមានការយាមកាមយ៉ាងតឹងរ៉ឹងនៅទីក្រុងបាកដាដ ដើម្បីចាប់ខ្លួនសមាជិកសភាដែលសង្ស័យថាប្រព្រឹត្តអំពើពុករលួយ។
ទីភ្នាក់ងារសារព័ត៌មានបារាំង AFP បានដកស្រង់សម្តីមន្ត្រីសន្តិសុខអ៊ីរ៉ាក់ម្នាក់ ដែលបាននិយាយថា នៅថ្ងៃទី 28 ខែមិថុនា កងកម្លាំងអ៊ីរ៉ាក់ «បានបើកការវាយឆ្មក់តាមបញ្ជារបស់តុលាការ ដោយកំណត់គោលដៅលើអ្នកនយោបាយជាច្រើននាក់ដែលសង្ស័យថាប្រព្រឹត្តអំពើពុករលួយ»។ ប្រតិបត្តិការនេះពាក់ព័ន្ធនឹងកងទ័ពអ៊ីរ៉ាក់ និងអង្គភាពប្រឆាំងភេរវកម្ម។
វីដេអូ និងរូបថតដែលបានចែករំលែកនៅលើប្រព័ន្ធផ្សព្វផ្សាយសង្គម បានបង្ហាញកងកម្លាំងសន្តិសុខអ៊ីរ៉ាក់នៅក្នុងតំបន់បៃតង ដែលជាតំបន់ដែលមានការយាមកាមយ៉ាងតឹងរ៉ឹងនៅទីក្រុងបាកដាដ ជាមួយនឹងឧបករណ៍ធុនធ្ងន់ដូចជារថក្រោះ M1 Abrams និងរថយន្តពាសដែក។
យោងតាម AFP កងកម្លាំងសន្តិសុខត្រូវបានដាក់ពង្រាយនៅច្រកចូលតំបន់បៃតង។ ការវាយឆ្មក់ទ្រង់ទ្រាយធំ ដើម្បីចាប់ខ្លួនមន្ត្រីជាន់ខ្ពស់ និងអ្នកនយោបាយក៏បានកើតឡើងនៅក្នុងតំបន់ផ្សេងទៀតនៃទីក្រុងបាកដាដផងដែរ។
ទីភ្នាក់ងារសារព័ត៌មានអ៊ីរ៉ាក់ INA បានដកស្រង់សម្តីមន្ត្រីជាន់ខ្ពស់ម្នាក់ ដែលបាននិយាយថា «ជនសង្ស័យមួយចំនួនត្រូវបានចោទប្រកាន់ពីបទពុករលួយ ដោយផ្អែកលើសក្ខីកម្មពីខែមុនដោយ Adnan al-Jumaili» អតីតរដ្ឋមន្ត្រីប្រេងអ៊ីរ៉ាក់ ដែលត្រូវបានចាប់ខ្លួនកាលពីខែមុន។ មន្ត្រីរូបនេះបាននិយាយថា សមាជិកសភាដែលត្រូវបានចាប់ខ្លួនលែងមានអភ័យឯកសិទ្ធិទៀតហើយ។
លោកនាយករដ្ឋមន្ត្រី អាលី អាល់-ហ្សៃឌី បានសន្យាថានឹងប្រយុទ្ធប្រឆាំងនឹងអំពើពុករលួយ និងការគ្រប់គ្រងមិនបានល្អ ដែលបានធ្វើឲ្យប្រទេសអ៊ីរ៉ាក់មានបញ្ហាអស់រយៈពេលជាច្រើនឆ្នាំ។ អាជ្ញាធរអ៊ីរ៉ាក់កាលពីដើមខែនេះបានរឹបអូសបានប្រាក់ចំនួន ៨៥ លានដុល្លារក្នុងករណីមួយទាក់ទងនឹងលោក ជូម៉ៃលី ដែលជាប្រាក់មួយចំនួនដែលលាក់ទុកនៅក្រោមដី។
លោកនាយករដ្ឋមន្ត្រី ហ្សៃឌី ត្រូវបានគេរំពឹងថានឹងធ្វើទស្សនកិច្ចសហរដ្ឋអាមេរិកនៅចុងខែនេះ។ មន្ត្រីការទូតម្នាក់នៅទីក្រុងបាកដាដបាននិយាយថា ការវាយឆ្មក់នៅថ្ងៃទី ២៨ ខែមិថុនា “គឺជាផ្នែកមួយនៃការរៀបចំសម្រាប់ដំណើរទស្សនកិច្ចនេះ ដែលបង្ហាញពីការប្តេជ្ញាចិត្តរបស់លោក ហ្សៃឌី ចំពោះការសន្យារបស់លោក”៕
