សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង ខណៈបង្គោលភ្លើងមួយដើម បានឆ្លងចរន្តអគ្គិសនីផ្ទុះប្រអប់កាប៊ីនភ្លើង ឆាបឆេះ និងខ្សែភ្លើង ខ្សែកាប្លិ៍ធ្លាក់ពាសពេញផ្លូវ ប៉ុន្តែមិនរាលដាលដល់ផ្ទះប្រជាពលរដ្ឋនោះទេ ព្រោះរថយន្តពន្លត់អគ្គិភ័យប្រចាំការនៅក្នុងអធិការដ្ឋាននគរបាលខណ្ឌទួលគោក ជួយអន្តរាគមន៍ទាន់ពេលវេលា ។
ករណីខាងលើនេះ បានកើតឡើងកាលពីវេលាម៉ោង៨និង៤០នាទីព្រឹក ថ្ងៃទី១១ ខែវិច្ឆិកា ឆ្នាំ២០១៦ ស្ថិតនៅតាមបណ្ដោយផ្លូវ២៧១ ក្បែរសាលាជាស៊ីមសាមគ្គី សង្កាត់បឹងសាឡាង ខណ្ឌទួលគោក រាជធានីភ្នំពេញ។
តាមប្រភពព័ត៌មានពីប្រជាពលរដ្ឋ ដែលបានឃើញហេតុការណ៍ បានឲ្យដឹងថា នៅពេលដែលពួកគាត់កំពុងតែធ្វើដំណើរតាមផ្លូវ ស្រាប់តែភ្លាមនោះ បង្គោលភ្លើងមួយដើមបានផ្ទុះឡើងបណ្ដាលឲ្យឆាបឆេះ កាប៊ីនភ្លើងបង្កភ្ញាក់ផ្អើលតែម្តង ។ ភ្លាមនោះប្រជាពលរដ្ឋបានរាយការណ៍ជូនទៅនគរបាលមូលដ្ឋាន ជួយអន្តរាគមន៍ ហៅ រថយន្តពន្លត់អគ្គិភ័យមកបាញ់ទឹកពន្លត់អស់មួយគ្រឿង ទើបរលត់ទៅវិញ៕ ស តារា
