សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ បើកម៉ូតូធ្វើសកម្មភាពឆក់កាបូបពីជនបរទេសកំពុងដើរតាមផ្លូវបានសម្រេច រួចបើកម៉ូតូគេចខ្លួនជ្រុលទៅបុករថយន្តបណ្តាលឲ្យដួលម៉ូតូ ភ្លាមនោះប្រជាពលរដ្ឋ និងសមត្ថកិច្ចដេញចាប់បានទាំង២នាក់។
ហេតុការណ៍នេះ កើតឡើងកាលពីម៉ោងជិត១១ព្រឹក ថ្ងៃទី១៨ ខែវិច្ឆិកា ឆ្នាំ២០១៦ នៅតាមផ្លូវលេខ៥១កែងផ្លូវ២៤២ ខាងមុខភោជនីយដ្ឋានចំប៉ា ស្ថិតនៅក្នុងសង្កាត់ចតុមុខ ខណ្ឌដូនពេញ ។
ជនសង្ស័យដែលសម្ថតកិច្ចឃាត់បានមានឈ្មោះ សួន ការុណ ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅផ្ទះជួល ម្ដុំជ្រោយចង្វា និងម្នាក់ទៀតឈ្មោះ យ៉េង ដាវិត ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះជួលម្ដុំជ្រោយចង្វា ។ ចំណែកជនរងគ្រោះមានឈ្មោះ Megan Mcguire ភេទស្រី អាយុ៥០ឆ្នាំ ជនជាតិអាមេរិកាំង និងជាបុគ្គលិកនៅស្ថានទូតអាមេរិក ។
ប្រភពពត៌មាននៅកន្លែងកើតហេតុបានឲ្យដឹងថា ជនរងគ្រោះដើរតាមផ្លូវលេខ៥១ ខណៈដើរមកដល់កែងផ្លូវលេខ២៤២ ស្រាប់មានជនសង្ស័យ២នាក់ បើកម៉ូតូមកពីក្រោយ ធ្វើសកម្មភាពឆក់កាបូបស្ពាយចំហៀង បានសម្រេច រួចបើកបើកម៉ូតូរត់តាមផ្លូវលេខ២៤២ទៅលិច មកដល់កែងផ្លូវលេខ៥៥បានជ្រុលទៅបុករថយន្តបណ្តាលឲ្យដួលម៉ូតូ ភ្លាមនោះមានប្រជាពលរដ្ឋ និងសមត្ថកិច្ចដេញចាប់បានជនសង្ស័យទាំង២នាក់ភ្លាមៗ ។
ក្រោយពេលកើតហេតុជនសង្ស័យទាំង២នាក់ និងម៉ូតូរបស់ជនសង្ស័យយកមកប៉ុស្តិ៍ចតុមុខ ដើម្បីសួរនាំ ។
សមត្ថកិច្ចបានឲ្យដឹងថា វត្ថុតាងដកហូតពីជនសង្ស័យរួមមានដាវ១ និងម៉ូតូស្មាស់វី ពាក់ស្លាកលេខកំពង់ឆ្នាំង 1E-9634 ជិះធ្វើសកម្មភាព ចំណែកនៅក្នុងកាបូបរបស់ជនរងគ្រោះរួមមានលុយ១០០ដុល្លារ ទូរស័ព្ទអាយហ្វូនហ្វាយ១គ្រឿង និងកាតអេធីអឹម រួមនឹងកាតបុគ្គលិកស្ថានទូត ។
បច្ចុប្បន្នជនសង្ស័យទាំង២នាក់កំពុងឃាត់ខ្លួនបណ្តោះអាសន្ននៅប៉ុស្តិ៍នគរបាលចតុកមុខ ដើម្បីកសាងសំណុំរឿងបញ្ជូនទៅតុលាការ ចំណែកកាបូបជនរងគ្រោះត្រូវសមត្ថកិច្ចប្រគល់ជូនជនរងគ្រោះវិញ ៕ ជ្រោយពេជ្រ
