សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ បុរសម្នាក់ទទួលរងរបួសយ៉ាងធ្ងន់ធ្ងរ រហូតស្លាប់បាត់បង់ជីវិតយ៉ាងអាណោចអាធ័មនៅកន្លែងកើតហេតុ បន្ទាប់ពីបុរសរូបនេះបើកម៉ូតូរេចង្កូតធ្លាកចូលក្នុងប្រឡាយក្បែរចវិញ្ចើមផ្លូវបោកផ្ទុបជាមួយដើមឈើ កាលពីវេលាម៉ោង២០ និង១៥នាទី ថ្ងៃទី១០ ខែមករា ឆ្នាំ២០១៧ តាមបណ្តោយផ្លូវក្រាលកៅស៊ូ ស្ថិតក្នុងភូមិប្របវត្ត ឃុំព្រៃពួច ស្រុកអង្គស្នូល ខេត្តកណ្ដាល ។
មន្ត្រីនគរបាលចរាចរណ៍ស្រុកអង្គស្នួលបានឲ្យដឹងថា ជនរងគ្រោះស្លាប់បាត់បង់ជីវិតនោះឈ្មោះ គឹម ចាន់ធឿន ភេទប្រុស អាយុ៣៨ឆ្នាំ ជនជាតិខ្មែរ មុខរបរ កម្មករ មានទីលំនៅភូមិដុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ ជិះម៉ូតូម៉ាកហុងដាគុបជ្រុង ធុនសេ៩០ ពណ៌ទឹកប៊ិច ពាក់ស្លាកលេខ ភ្នំពេញ 1G-1087 ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះរូបនេះជិះម៉ូតូតែម្នាក់ឯង តាមបណ្តោយផ្លូវក្រាលកៅស៊ូ ក្នុងទិសដៅពីត្បូងទៅជើងដោយល្បឿនលឿន ស្ថិតក្នុងសភាពរេចង្កូតពេញផ្លូវ ។ លុះបើកដល់ចំណុចកើតហេតុទំនងជាជនរងគ្រោះបាត់បង់ម្ចាស់ការបណ្តាលឲ្យម៉ូតូរេចង្កូតធ្លាក់ចូលទៅក្នុងប្រឡាយក្បែរចិញ្ចើមផ្លូវ ធ្វើឲ្យជនរងគ្រោះបោកផ្ទុបជាមួយគល់ឈើស្លាប់យ៉ាងអណោចអធ័មតែម្តង ។
ក្រោយពីមានហេតុការណ៍កើតឡើងម៉ូតូ និងសាកសពជនរងគ្រោះ ត្រូវបានប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ៕ ស្អាងជ័យ
