បើករថយន្តងងុយដេករេចង្កូតធ្លាក់ផ្លវទៅបុកដើមត្នោតរងរបួសធ្ងន់

ខេត្តកំពង់ធំ៖ កាលពីវេលាម៉ោង៩និង៣០នាទីយប់ ថ្ងៃទី៣ ខែមីនា ឆ្នាំ២០១៧ មានករណីគ្រោះថ្នាក់ចរាចរណ៍កើតឡើង ដោយសារអ្នកបើករថយន្តម៉ាកហ៊ីយ៉ាន់ដាយ បើកបរក្នុងស្ថានភាពងងុយដេក ក៏រេចង្កូតធ្លាក់ផ្លវទៅបុកដើមត្នោតខូចខាតរថយន្ដយ៉ាងដំណំ នៅនៅចំណុច ភូមិស្រឡៅត្បូង ឃុំបល្ល័ង្ក ស្រុកបារាយណ៌ ខេត្តកំពង់ធំ ។

យោងតាមប្រភពព័ត៌មានពីសមត្ថកិច្ចនគរបាលចរាចរណ៍បានឲ្យដឹងថា មុនពេលកើតហេតុ គេបានឃើញរថយន្ដម៉ាកហ៊ីយឹនដាយនេះ ដឹកដំឡូងមកពីខេត្តព្រះវិហារ ឆ្ពោះទៅខេត្តកំពង់ចាម មកដល់ចំណុចកើតហេតុខាងលើ តៃកុងបានងងុយដេក ក៏រេចង្កូតធ្លាក់ថ្នល់ទៅបុកដើមត្នោតតែម្ដង ក្រោយកើតហេតុត្រូវសមត្ថកិច្ចចុះមកវាស់វែងបញ្ជូនជនរងគ្រោះទៅមន្ទីរពេទ្យស្រុក ហើយបន្ដ បញ្ជូនបន្ដទៅពេទ្យខេត្តកំពង់ចាម ។

រថយន្ដពណ៍ស ពាក់ស្លាកលេខ កំពង់ចាម 3A3069 បើកដោយឈ្មោះ សុខ លីម ភេទប្រុស អាយុ27ឆ្នាំ រស់នៅភូមិ3 សង្កាត់វាលវង់ ក្រុងកំពង់ចាម ខេត្តកំពង់ចាម (រងរបួសធ្ងន់) ក្រោយមកម្ចាស់រថយន្តបានរករថយន្តមកស្ទូចដើម្បីយកទៅជួសជុល៕ ប៊ុនរិទ្ធី