សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាសម្តែងស្រីសម្តីបានពីររូប បានប៉ះគ្នាក្នុងឈុតកំប្លែងកាច់កុងឈ្នានីសគ្នាជាលើកដំបូង ក្នុងខ្សែភាពយន្តរឿង“Supper Mom”របស់ផលិតកម្មមហាហង្ស ។ ភាពយន្តថ្មីបែបកំប្លែងនេះបានសម្ពោធចាប់ចាក់បញ្ចាំងហើយកាលពីថ្ងៃទី៣ មេសា ឆ្នាំ២០១៧ នៅរោងភាពយន្តលេជេនទួលគោកក្រោមវត្តមានសិល្បករជាច្រើនរូប ។
អគ្គនាយកប្រតិបត្តិផលិតកម្មមហាហង្ស លោកអ៊ិន សុភិន បញ្ជាក់ថា “Supper Mom” គឺជាខ្សែភាពយន្តកំប្លែងថ្មីប្លែកបែបស្រុកស្រែ ដែលចូលរួមសម្តែងដោយតារាកំប្លែងប្រុស ស្រីល្បីឈ្មោះជាច្រើន ។ លោកបញ្ជាក់ថា ខ្សែភាពយន្តថ្មីនេះ គឺនិយាយពីក្រុមគ្រួសារពីររបស់នាង ខ្ញុង និងនាង កាតុ ដែលម្តាយនឹងម្តាយតែងកាត់កុងផ្ចាញ់ផ្ចាល ឌឺដងគ្នា ខណៈដែលកូនប្រុស ស្រីរបស់ពួកគេស្រឡាញ់គ្នា ។
អ្វីដែលកាន់តែប្លែកខ្សែភាពយន្តនេះមានឈុតឆាកកំប្លែងស្នេហាជាដើមដែលធ្វើឲ្យអ្នកទស្សនាពេញចិត្តសម្រាប់ខ្សែភាពយន្តនេះ ។ អ្នកនាងបន្តថាខ្សែភាពយន្តនេះបានចំណាយទុនប្រមាណជាង៧ម៉ឺនដុល្លារមុនពេលចាក់បញ្ចាំងនៅរោងភាពយន្តក្នុងអំឡុងចុងឆ្នាំ២០១៦ខាងមុខ ។ លោកថា នេះគឺជាខ្សែភាពយន្តខ្នាតធំទីបីហើយដែលផលផលិតកម្មចេញថតក្នុងឆ្នាំនេះបន្ទាប់ពីរឿង“៣០ថ្ងៃ”។ លោកបញ្ជាក់ថា ការជ្រើសរើសតួអង្គសំខាន់ពីររូបគឺអ្នកនាងកាតុ និងនាងខ្ញុងសម្តែងក្នុងខ្សែភាពយន្តនេះ ព្រោះតែអ្នកទាំងពីរគឺជាតារាកំប្លែងដែលពូកែខាងលេងពាក្យសម្តីផ្លែផ្កាឌឺដងគ្នាហើយមិនដែលសម្តែងរូមគ្នាពីមុនមកហើយផលិតកម្មជឿជាកក់ថាខ្សែភាពយន្តថ្មីនេះនឹងទទួលបានការគាំទ្រច្រើននៅពេលចាក់បញ្ចាំងនៅរោងភាពយន្តនៅពេលខាងមុខ។
អ្នកនាងកាតុ បញ្ជាក់ថា ក្នុងខ្សែភាពយន្តនេះ នាងសម្តែងជាតួម្តាយឈ្មោះ នាយខ្សាយ ជាម្តាយតួឯកស្រី ។ នាងបន្តថា វាពិតជាប្លែកដែលអ្នកនិពន្ធ និងដឹកនាំរឿងជ្រើសរើសនាង និងនាង ខ្ញុង មកសម្តែងរួមគ្នាជាលើកដំបូងហើយពួកនាងសុទ្ធតែសម្តីមិនចេះចាញ់គ្នា ។ នាងបន្តថា ឈុតឆាកកំប្លែងសើចចុកពោះ ព្រោះតែការកាច់កុងគ្នាច្រើន ពិសេសគឺការកំប្លែងបែបស្រុកស្រែថ្មីប្លែកពីរឿងមុនៗ ។
នាង ស្រេង សុកាន់ដា ហៅនាង ខ្ញុង បានបញ្ជាក់ដែរថា បើទោះបីជាមិនធ្លាប់សម្តែងរួមគ្នាក្នុងខ្សែភាពយន្តខ្នាតធំពីមុនមកក្តី ក៏នាងនិងអ្នកនាងកាតុ ធ្លាប់បានជួបគ្នាជាញឹកញាប់ក្នុងកម្មវិធីកម្សាន្តនានារបស់ទូរទស្សន៍ហើយការចាក់សម្តីឌឺដងទៅវិញទៅមក ក៏តែងធ្វើឡើងដែរកន្លងមក ប៉ុន្តែវាត្រឹមតែនៅលើឆាក ខណៈដែលការរាប់អានគ្នាជិតដិតនៅក្រោយឆាក ។ នាងបន្តថា ខ្សែភាពយន្តនេះ នឹងធ្វើឲ្យអ្នកទស្សនាពេញចិត្តជាមួយនឹងឈុតឆាកកំប្លែងថ្មីជាក់ជាមិនខាន ។
គួរបញ្ជាក់ដែរថា ខ្សែភាពយន្តរឿង “Supper Mom” ត្រូវបាននិពន្ធឡើងដោយលោក អ៊ិន សុភិន កែសម្រួលដោយលោក សោម សារ៉ាពេជ្រ ដឹកនាំសម្តែងដោយលោក ជុំ វិចិត្រ ។ តារាសម្តែងក្នុងខ្សែភាពយន្តនេះ ភាគច្រើនគឺជាតារាកំប្លែងប្រុស ស្រីល្បីឈ្មោះមានដូច ជានាយ ពាក់មី នាយ ក្រូច នាយគ្រឿន នាយ សុបិន DJ កាកា កញ្ញា សុខ សោមាវត្តី នាង ខ្ញុង នាងកាតុ និងតារាសម្តែងជាច្រើនរូបទៀត ៕ វឌ្ឍនា
