សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចឃាត់ខ្លួនមនុស្សបួននាក់ករណីប្រើប្រាស់គ្រឿងញៀន និងចាប់យកដាវសាំម៉ូរ៉ៃ១ដើម ឧបករណ៍ប្រើប្រាស់គ្រឿងញៀនមួយចំនួន កាលពីវេលាម៉ោង១២និង៣០នាទី ថ្ងៃទី២៩ ខែមេសា ឆ្នាំ២០១៧ នៅចំណុចបន្ទប់ជួល ភូមិបុរីកម្មក សង្កាត់ទឹកថ្លា ខណ្ឌសែនសុខ ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួននេះទីមួយ ឈ្មោះ ឃុន វាសនា ភេទប្រុស អាយុ២៨ឆ្នាំ មុខរបរ និងស្នាក់នៅមិនពិតប្រាកដ ទី២ឈ្មោះ ញ៉ែម ដាវីដ ភេទប្រុស អាយុ២៦ឆ្នាំ មុខរបរមិនពិត ស្នាក់នៅភូមិទឹកថ្លា សង្កត់ទឹកថ្លា ខណ្ឌសែនសុខ ទី៣ឈ្មោះ ឆា សុខណេត ភេទប្រុស អាយុ២០ឆ្នាំ បច្ចុប្បន្នស្នាក់នៅបន្ទប់ជួលខាងលើ និងមានស្រុកកំណើតភូមិពាមឈើកង ឃុំពាមឈើកង ស្រុកកងមាស ខេត្តកំពង់ចាម និងទី៤ ឈ្មោះ រិទ្ធ ឧត្តម ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅភូមិបុរីកម្មករ សង្កាត់ទឹកថ្លា ខណ្ឌសែនសុខ។
ប្រភពពីសមត្ថកិច្ចបានបន្តទៀតថា មុននឹងឃាត់ខ្លួនជនសង្ស័យទាំងបួននាក់ខាងលើនេះ គឺសមត្ថកិច្ចបានប្រើប្រាស់កម្លាំងសម្ងាត់ និងតាមដានស្រាវជ្រាវហើយបានសុំគោលការណ៍ពីលោកព្រះរាជអជ្ញារងដើម្បីឆែកឆេរបន្ទប់ជួលខាងលើទើបឃាត់ខ្លួនបានពួកគេទាំងបួននាក់ និងដាវសាំម៉ូរ៉ៃ១ដើម សម្ភារៈប្រើប្រាស់មួយចំនួន ហើយយកមកសាកសួរនៅអធិការដ្ឋាននគរបាលខណ្ឌសែនសុខដើម្បី កសាងសំណុំរឿងបញ្ជួនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕ តុង សីហា
