សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ជនសង្ស័យ២នាក់ក្នុងចំណោមបក្ខពួក៣នាក់ ត្រូវបានសមត្ថកិច្ចនគរបាលស្រុកលើកស្រាវជ្រាវបង្ក្រាបចាប់ខ្លួនបាន នៅវេលារសៀលថ្ងៃទី១០ ខែឧសភា ឆ្នាំ២០១៧ ដើម្បីកសាងសំណុំរឿងចាត់ការតាមច្បាប់ បន្ទាប់ពីជនសង្ស័យទាំង២នាក់នេះនិងបក្ខពួកធ្វើសកម្មភាពលួចម៉ូតូមួយគ្រឿង កាលពីវេលាម៉ោង១ និង៣០នាទីទាបភ្លឺ ថ្ងៃទី២ ខែឧសភា ឆ្នាំ២០១៧ ត្រង់ចំណុចក្រោមផ្ទះរបស់ឈ្មោះ ស៊ុន សួង ស្ថិតក្នុងភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល ។
មន្ត្រីនគរបាលស្រុកលើកដែកបានឲ្យដឹងថា ជនសង្ស័យ២នាក់ដែលត្រូវបានចាប់ខ្លួននោះ ទី១-ឈ្មោះ សឿន សុវណ្ណ ភេទប្រុស អាយុ១៧ឆ្នាំ ជនជាតិខ្មែរ មុខរបរ មិនពិតប្រាកដ ទី២-ឈ្មោះ ជឿន ភារ: ភេទប្រុស អាយុ២២ឆ្នាំ ជនជាតិខ្មែរ មុខរបរ មិនពិតប្រាកដ ។ ជនសង្ស័យទាំង២នាក់នេះមានទីលំនៅភូមិស្ពានដែក ឃុំព្រែកទន្លាប់ ស្រុកលើកដែក ។ ជនរងគ្រោះឈ្មោះ ច្រឹក ស្រីណែត ភេទស្រី អាយុ២៩ឆ្នាំ ជនជាតិខ្មែរ មុខរបរ លក់ដូរ មានទីលំនៅភូមិស្ពានដែក ឃុំព្រែកទន្លាប់ ស្រុកលើកដែក ជាម្ចាស់ម៉ូតូម៉ាកហុងដាឌ្រីម ធុនសេ១២៥ ពណ៌ស្លែ គ្មានស្លាកលេខ ។
ប្រភពដដែលបានបន្តថា នៅវេលាយប់ថ្ងៃទី១ ខែឧសភា ឆ្នាំ២០១៧ ជនរងគ្រោះបានយកម៉ូតូរបស់ខ្លួនទៅទុកនៅខាងក្រោមផ្ទះម្តាយ ដោយពុំមានអ្នកដេកចាំនោះទេ លុះព្រឹកឡើងថ្ងៃទី២ ខែឆ្នាំដដែល បានម៉ូតូមិនឃើញ ។ ជនរងគ្រោះក៏បានទៅដាក់ពាក្យបណ្តឹងនៅសមត្ថកិច្ចនគរបាលប៉ុស្តិ៍ ។ បន្ទាប់ពីទទួលបានពាក្យបណ្តឹងជនរងគ្រោះរួចមក សមត្ថកិច្ចនគរបាលយុត្តិធម៌ស្រុកសហការជាមួយនគរបាលប៉ុស្តិ៍ធ្វើការស្រាវជ្រាវ ឈានដល់បង្រ្កាបចាប់ខ្លួនជនសង្ស័យបាន២នាក់ ខណៈដែលជនសង្ស័យម្នាក់ទៀតកំពុងរត់គេចខ្លួន ។
នៅចំពោះមុខសមត្ថកិច្ចជនសង្ស័យបានសារភាពថា ពួកគេទាំង២នាក់ និងបក្ខពួកម្នាក់ទៀតពិតជាបានធ្វើសកម្មភាពលួចម៉ូតូជនរងគ្រោះប្រាកដមែន ។ ជនសង្ស័យបានបញ្ជាក់ថា ម៉ូតូដែលលួចបានៗយកទៅលក់ឲ្យជនមិនស្គាល់ឈ្មោះ នៅឯអ្នកលឿងត្រើយខាងកើត (ភូមិសាស្ត្រខេត្តព្រៃវែង ) ៕ ស្អាងជ័យ
