សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនសង្ស័យម្នាក់ត្រូវបានសមត្ថកិច្ចនគរបាលប៉ុស្តិ៍រដ្ឋបាល សហការជាមួយអធិការនគរបាលស្រុកស្ទាក់ចាប់បាន ខណៈដែលធ្វើសកម្មភាពឆក់ខ្សែកមាស១តម្លឹងរបស់ជនរងគ្រោះកំពុងធ្វើដំណើរតាមផ្លូវ ។
ហេតុការណ៍នេះបានកើតឡើងកាលពីវេលាម៉ោង៩ព្រឹក ថ្ងៃទី១៧ ខែឧសភា ឆ្នាំ២០១៧ នៅចំណុចភូមិកោះក្បានកណ្តាល ឃុំសំរោង ស្រុកចន្ទ្រា ខេត្តស្វាយរៀង។
យោងតាមសមត្ថកិច្ចស្រុកបានឲ្យដឹងថា ជនសង្ស័យឈ្មោះ ភឿក ចាន់រ៉ា អាយុ៣៩ឆ្នាំ មុខរបរមិនពិតប្រាកដ មានទីលំនៅភូមិពោធិ៍ ឃុំមេសរថ្ងក ស្រុកចន្រ្ទាខេត្តស្វាយរៀង។
យោងតាមអ្នកភូមិបានអោយដឹងថា មុនពេលកើតហេតុ មានជនសង្ស័យម្នាក់បានជិះម៉ូតូកញ្ចាស់មួយគ្រឿង ពណ៌ក្រហម ខណៈនោះស្រាប់តែឃើញជនសង្ស័យបានឆក់ខ្សែកពីស្ត្រីម្នាក់មិនស្គាល់ឈ្មោះបានសម្រេច ហើយក៏បានជិះគេចខ្លួនពីលិចទៅកើត ខណៈនោះជនរងគ្រោះបានស្រែកចោរៗផ្អើលអ្នកភូមិ និងសមត្ថកិច្ចនាំគ្នាដេញចាប់ជិតកន្លះម៉ោងទើបចាប់បាន រួចនាំខ្លួនមកនគរបាលប៉ុស្តិ៍ដើម្បីសាកសួរបន្ថែមបន្តទៀត។
សមត្ថកិច្ចបញ្ជាក់ថា រហូតមកដល់រសៀលនេះខ្សែកមាសទម្ងន់១តម្លឹងត្រូវបានសមត្ថកិច្ចប្រគល់ទៅឲ្យស្ត្រីរងគ្រោះវិញផងដែរ ៕ យឹម សុថាន
