សៅ ឧត្ដមចូលប្រឡូកក្នុងការសម្តែង ប៉ុន្តែមិនចោលចម្រៀង

ភ្នំពេញ៖ បទចម្រៀង«សុំទោស» របស់តារាចម្រៀង សៅ ឧត្តម បានលេចចេញការគាំទ្រខ្លាំងជាមួយនឹងស្នាដៃសម្តែងលើកដំបូងផ្ទាល់របស់លោកផងដែរ។ ទោះឈានជើងប្រឡូកក្នុងអាជីពថ្មីក្តី ក៏តារារូបនេះមិនបោះបង់ការច្រៀងនោះដែរ។

អតីតបេក្ខភាព៣នាក់ចុងក្រោយនៃកម្មវិធី Cambodia Idol រដូវកាលទី១ តារាចម្រៀងលោកសៅ ឧត្ដម និយាយថា បើទោះជាអាជីពសម្ដែងទើបប្រកាសប្រឡូកនាពេលថ្មីៗទទួលការគាំទ្រខ្លាំងពីទស្សនិកជនក្ដី ក៏លោកនៅមិនបោះបង់អាជីពចម្រៀងនោះដែរ។ លោកថា បើអាចរីកចម្រើនទាំងពីរមែនកាន់តែប្រសើរ។ ការលើកឡើងនេះដែរ ស្របពេលដែលតារាចម្រៀងរូបនេះបានបោះជំហ៊ានចូលច្រៀង និងសម្តែងឲ្យផលិតកម្ម LD Picture ដែលជាផលិតកម្មនាំមុខផ្នែកផលិតភាពយន្តខ្នាតធំ និងភាពយន្តភាគនៅកម្ពុជានោះ។

តារាចម្រៀងវ័យក្មេងរូបនេះអះអាងដូច្នេះ គ្រាដែលលោកទើបចុះកុត្រាឲ្យផលិតកម្ម LD Picture រយៈពេល ៣ឆ្នាំ កាលពីពេលថ្មីៗ។ គ្រាន់តែចុះកុងត្រាភ្លាមម្ចាស់ផលិតកម្មលោក លៀក លីដាផ្ដល់ការថតភាពយន្ត ៣ទៅ៤រឿងភ្លាម ហើយថែមទាំងមានឱកាសអាចច្រៀងឲ្យផលិតកម្ម បានទៀតផង។ លោកជឿជាក់ថា ការបោះជំហានចូលក្នុងអាជីពសម្ដែងអាចនឹងធ្វើឲ្យប្រជាប្រិយភាពរបស់ខ្លួនកើនខ្ពស់មួយកម្រិតទៀត។

ទន្ទឹមនឹងក្ដីសប្បាយរីករាយចំពោះអ្វីដែលម្ចាស់ផលិតកម្ម LD Picture ផ្ដល់ឲ្យ តារាចម្រៀងលោក សៅ ឧត្ដមបានប្ដេជ្ញាចិត្តថា នឹងប្រឹងសម្ដែងឲ្យអស់ពីសមត្ថភាពក្នុងន័យកសាងកេរ្តិ៍ឈ្មោះរបស់ខ្លួនក្នុងពិភពសិល្បៈឲ្យកាន់តែខ្លាំងជាងមុន។ យ៉ាងណាលោកក៏ស្នើទស្សនិកជន និងអ្នកគាំទ្ររបស់ខ្លួនជួយគាំទ្រស្នាដៃភាពយន្តរបស់លោកត្រៀមនឹងចេញនាពេលដ៏ខ្លីខាងមុខផងដែរ ៕ វឌ្ឍនា