សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ រថយន្តរេវ៉ូ ពាក់ស្លាកលេខរដ្ឋ16 2-0495 បើកបោះពួយបុកគ្នាជាមួយរថយន្តដឹកទឹកកកពេញមួយទំហឹងនៅលើកំណាត់ផ្លូវជាតិលេខ៦ បណ្តាលឲ្យមនុស្ស៤នាក់រងរបួសធ្ងន់ស្រាល កាលពីវេលាម៉ោង១៤ និង៥០នាទី ត្រង់ចំណុចចន្លោះគីឡូម៉ែត្រលេខ៣៦-៣៧ ស្ថិតក្នុងភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា រថយន្តដឹកទឹកកកម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ2AE-2713 បើកបរដោយឈ្មោះ អែល ទីរ៉ូ ភេទប្រុស អាយុ២៩ឆ្នាំ (រងរបួសស្រាល) មានទីលំនៅភូមិបន្លាស្អិត សង្កាត់ឃ្មួញខណ្ឌសែនសុខ រាជធានីភ្នំពេញ និងមានអ្នករួមដំណើរជាមួយម្នាក់ឈ្មោះ ឆែម សុឃាន់ ភេទប្រុស អាយុ២៤ឆ្នាំ (រងរបួសស្រាល) មានទីលំនៅភូមិជ័យមង្គល ឃុំជ្រាប ស្រុកសន្ទុក ខេត្តកំពង់ធំ ។
ប្រភពដដែលបានបន្តថា រថយន្តររ៉េវ៉ូ ពណ៌ស ពាក់ស្លាកលេខរដ្ឋ16 2-0495 បើកបរដោយឈ្មោះ ហុង ម៉េងសុង ភេទប្រុស អាយុ៥៧ឆ្នាំ មានទីលំនៅផ្ទះលេខ១៩E៣ ផ្លូវលេខ១៦៦សង្កាត់អូឫស្សី៤ ខណ្ឌ៧មករា រាជធានីភ្នំពេញ និងមានអ្នករួមដំនើរជាមួយម្នាក់ឈ្មោះ ចាន់ សុភា ភេទប្រុស អាយុ៤៩ឆ្នាំ (រងរបួសធ្ងន់) មានទីលំនៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។
មន្ត្រីនគរបាលចរាចរណ៍ស្រុកមុខកំពូលបានបញ្ជាក់ថា នៅមុនពេលកើតហេតុរថយន្តវីហ្គោបានបើកបរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើងដោយប្រកាន់គន្លងផ្លូវខាងស្តាំរបស់ខ្លួន ។ លុះមកដល់ម្តុំកន្លែងកើតហេតុក្រុមហ៊ុនចិនបានបិតគន្លងផ្លូវមួយចំហៀងដើម្បីជួសជូលផ្លូវ ទើបអ្នកបើកបររថយន្តរ៉េវ៉ូបើកប្តូរទៅគន្លងខាងឆ្វេងដៃ ខណៈកំពុងបើកក៏បានបុកគ្នាជាមួយរថយន្តដឹកទឹកកកដែលបើកបរច្រាស់ទិសគ្នាពេញមួយទំហឹង បណ្តាលឲ្យមានអ្នករងរបួសយ៉ាងដូច្នេះ ។
ក្រោយពីមានហេតុការណ៍កើតឡើងជនរងគ្រោះរងរបួសធ្ងន់ស្រាល ត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យបង្អែករកាកោង ។ ចំណែកឯរថយន្តទាំង២គ្រឿងត្រូវបានបញ្ជូនទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។
នគរបាលចរាចរណ៍ស្រុកមុខកំពូលបានបញ្ជាក់ថា ផ្លូវជាតិលេខ៦មានសួនច្បារពុះចែកទ្រូងផ្លូវ ហើយនៅមុនពេលកើតហេតុក្រុមហ៊ុនចិនបានបិតគន្លងផ្លូវមួយចំហៀង ដើម្បីជួសជុលផ្លូវ ដោយទុកមួយចំហៀងឲ្យមធ្យោបាយធ្វើដំណើរឆ្លងកាត់ ខណៈដែលរថយន្តរ៉េវ៉ូបើកទៅគន្លងផ្លូវខាងឆ្វេង អ្នកបើកបររថយន្តដឹកទឹកកកមិនបានបើកអែមកៀននោះទេ ពោលគឺបើកនៅក្បែរសួនច្បារ ដោយនឹកស្មានថារថយន្តវីហ្គោបើករំលោភលើផ្លូវរបស់ខ្លួន ទើបមិនព្រមគេច ក៏បណ្តាលឲ្យបុកគ្នាពេញមួយទំហឹងតែម្តង ៕ ស្អាងជ័យ
