សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ សមត្ថកិច្ចនគរបាលប៉ុស្តិ៍ភ្នំពេញថ្មី ខណ្ឌសែនសុខ បានឃាត់ខ្លួន ក្រុមយុវជនជាក្មេងទំនើងចំនួន៥នាក់ពីបទបង្ករទំនាស់វាយតប់គ្នា អុកឡុកក្នុងមូលដ្ឋាន កាលពីវេលាម៉ោង២ រំលងអធ្រាត្រ ឈានចូលថ្ងៃទី២៨ ខែមិថុនា ឆ្នាំ២០១៧ នៅក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក ដួង វណ្ណៈ នាយប៉ុស្តិ៍នគរបាលរដ្ឋបាល សង្កាត់ភ្នំពេញថ្មី បានរាយការណ៍ថា÷ នៅវេលាម៉ោងកើតហេតុ មានប្រជាជនរាយការណ៍តាមទូរស័ព្ទមកថា មានក្រុមក្មេងទំនើងដេញវាយតប់គ្នាពេញផ្លូវ នៅតាមបណ្តយផ្លូវលេខ១៩៨៦ ភ្លាមៗនោះ លោកបានប្រមូលកម្លាំងតាមវិទ្យុទាក់ទង មកឡោមព័ទ្ឋចាប់ខ្លួនពួកគេមានគ្នាទាំងអស់៥នាក់យកមកសួរនាំ។
ក្រុមក្មេងទំនើងបង្កជម្លោះទាំង៥នាក់ខាងលើនោះ ភាគីក្រុមទី១ មានឈ្មោះ ១/ ខុម ប៉េងឡុង ភេទប្រុស អាយុ១៨ឆ្នាំ រស់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ២/ ខុម ប៉េងហុង ភេទប្រុស អាយុ១៩ឆ្នាំ នៅភូមិភ្នំពេញថ្មី សង្កាត់ភ្នំពេញថ្មី ៣/ឃឿន សុផៃ ហៅម៉ៅ ភេទប្រុស អាយុ២៣ឆ្នាំ រស់នៅភូមិភ្នំពេញថ្មី សង្កាត់ភ្នំពេញថ្មី ។ រីឯក្រុមទី២ មានគ្នា២នាក់ ១/ ឈ្មោះ សេត ហ្វីន ជនជាតិចាម អាយុ២៩ឆ្នាំ ភេទប្រុស ស្នាក់នៅផ្ទះជួល ក្នុងភូមិភ្នំពេញថ្មី ។ ២/ឈ្មោះ ម៉ាត់ សាគីរីន អាយុ២២ឆ្នាំ ជនជាតិចាម ស្នាក់នៅផ្ទះជួលជាមួយគ្នា ក្នុងភូមិភ្នំពេញថ្មី។
ក្រោយការសាកសួររបស់សមត្ថកិច្ចពីភាគីទាំង២បានឲ្យដឹងថា ពួកគេបង្កទំនាស់វាយតប់គ្នានេះ គឺដោយសារតែការផ្តើមចេញពីទំនាស់ពាក្យសំដី ឌឺដងដាក់គ្នាប៉ុណ្ណោះ ដោយមិនអាចទប់កំហឹងរៀងៗខ្លួនបាន ទើបឈានទៅ វាយតប់គ្នា បង្កការភ្ញាក់ផ្អើលដល់សមត្ថកិច្ចមកឃាត់ខ្លួនតែម្តង៕ តុង សីហា
