ឈីលីឡើទៅកាន់វគ្គផ្តាច់ព្រ័ត្រក្រោយឈ្នះព័រទុយហ្គាល់ដោយបាល់ប៉េណាល់ទី

ក្រុមជម្រើសជាតិឈីលីដែលជាក្រុមអតីតម្ចាស់ជើងឯកតំបន់អាមេរិកខាងត្បូងបានយកឈ្នះ ក្រុមអតីតម្ចាស់ជើងឯកយូរ៉ូព័រទុយហ្គាល់ដោយការកាត់សេចក្តីទាល់បាល់ប៉េណាល់ទីក្នុង លទ្ធផល ៣-០ នៃព្រឹត្តិការណ៍ប្រកួតពានរង្វាន់ Confederations Cup នៅប្រទេសរុស្សុី កាល ពីថ្ងៃពុធ។

អ្នកចាំទីក្រុមជម្រើសជាតិឈីលី Claudio Bravo បានសង្គ្រោះបាល់ប៉េណាល់ចំនួន៣គ្រាប់ ជាប់ៗគ្នាដើម្បីជួយឲ្យក្រុមរបស់គេទទួលជ័យជម្នះលើក្រុមជម្រើសជាតិព័រទុយហ្គាល់ ក្រោយពីការប្រកួតវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Confederations Cup របស់ពួកគេ បានបញ្ចប់ក្នុងលទ្ធផល ០-០ នៅនាទីបន្ថែម១៥នាទីពីរដង។

ការសង្គ្រោះបាល់ប៉េណាល់ទីរបស់អ្នកចាំទី Bravo ៣គ្រាប់ដំបូងរបស់ក្រុមជម្រើស ជាតិព័រទុយហ្គាល់ ពីការស៊ុតរបស់កីឡាករ Ricardo Quaresma, Joao Moutinho និង Nani ស្របពេលដែលក្រុមជម្រើសជាតិឈីលីបានស៊ុតបាល់ប៉េណាល់ទីបញ្ចូលទី ៣គ្រាប់ដំបូងជាប់ៗគ្នាធ្វើឲ្យក្រុមឈីលីទទួលជ័យជម្នះតែម្តង ។

ប្រធានក្រុមជម្រើសជាតិព័រទុយហ្គាល់កីឡាករ Cristiano Ronaldo មិនបានស៊ុតបាល់ ប៉េណាល់ទីឡើយ ដូចដែលក្នុងពេលក្រុមជម្រើសជាតិព័រទុយហ្គាល់ ចាញ់ក្រោមស្នាដៃក្រុមអេស្ប៉ាញ ដោយការស៊ុតបាល់ទីកាត់សេចក្តីក្នុងព្រឹត្តិការណ៍ Euro វគ្គពាក់កណ្តាល់ផ្តាច់ព្រ័ត្រ ឆ្នាំ២០១២ដែរ។

គ្រូបង្វឹករបស់ក្រុមជម្រើសជាតិឈីលីលោក Juan Antonio Pizzi បានបង្ហាញក្តីរំភើបថា «ខ្ញុំពិតជាមានមោទនភាពណាស់ទៅលើក្រុមនេះ។ Claudio Bravo បានសង្គ្រោះបាល់ល្អៗ ជាច្រើន ដើម្បីជួយឲ្យឈ្នះការប្រកួតនេះ»។

សូមបញ្ជាក់ថា ក្រុមជម្រើសជាតិឈីលី នឹងឈានទៅប្រកួតវគ្គផ្តាច់ព្រ័ត្រក្នុងទីក្រុង St Petersburg នាថ្ងៃអាទិត្យនេះដើម្បីជួបជាមួយនឹងក្រុមជម្រើសជាតិម៉ិចស៊ីកូ ឬអាល្លឺម៉ង់ ដែលនឹងត្រូវជួបប្រកួតគ្នាកាលពីថ្ងៃព្រហស្បតិ៍នេះ ក្នុងការប្រកួតវគ្គពាក់កណ្តាលផ្តាច់ព្រ័ត្រ មួយគូទៀតក្នុងទីក្រុង Sochi ប្រទេសរុស្សុី ។

ខាងក្រោមនេះគឺជាលទ្ធផលនៃការប្រកួតកាលពីថ្ងៃទី២៨ ខែមិថុនា ឆ្នាំ២០១៧៖