សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ លោកគឹម សេតារា ប្រធានអាជ្ញាធរជាតិព្រះវិហាររួមទាំង លោកប្រធានអនុប្រធាននាយកដ្ឋានរម ណីយដ្ឋាននិងបុរាណវិទ្យានៃអាជ្ញាធរជាតិព្រះវិហារបានប្រារព្ធពិធីពាលីក្រុងសូម សេចក្តីសុខក្នុងឱកាសដង្ហែលិង្គព្រះឥសូរយកទៅរក្សាទុកក្នុងសារមន្ទីរសកលធម្មជាតិសម្តេចតេជោក្រោយពីក្រុមការងារបុរាណវិទូបានប្រទះឃើញនៅលើថ្មកម្រាលខឿនខាងក្រោមនៃជណ្តើរបុរាណខាងជើងប្រាសាទព្រះវិហារ។ ពិធីនេះប្រារព្ធធើ្វឡើងនៅរសៀលថ្ងៃទី១៣ ខែកញ្ញា ឆ្នាំ២០១៧ ។
លោក គឹម សេតារា ប្រធានអាជ្ញាធរ ជាតិព្រះវិហារបានឲ្យដឹងថា លិង្គព្រះឥសូរ ជាវត្ថុបុរាណនាសម័យអង្គរសាងឡើងអំពីថ្មភក់មានប្រវែង២ម៉ែត្រ១តឹកកន្លះទទឹង ជិត៣តឹកដែលក្រុមការងារបុរាណវិទូ នាយកដ្ឋានរមណីយដ្ឋាននិងបុរាណ វិទ្យានៃអាជ្ញាធរជាតិព្រះវិហារបានប្រទះឃើញនៅលើថ្មកម្រាលខឿនខាងក្រោមនៃជណ្តើរបុរាណខាងជើងប្រាសាទព្រះវិហារ កាលពីថ្ងៃទី២០ ខែមេសា ឆ្នាំ២០១៧ ក្នុងពេលចុះសិក្សាស្រាវជ្រាវ ប្រព័ន្ធបង្ហូរទឹកបុរាណនៅសងខាងជណ្តើរ ក្នុងគម្រោងស្តារប្រព័ន្ធទឹកដែលកកស្ទះ ឡើងវិញ ។
លោកបានបន្តថា ដើម្បីរក្សាការពារវត្ថុបុរាណទាំងនេះបានគឺដោយសារយើង មានសារមន្ទីរដ៏ស្រស់ស្អាតមួយកន្លែង នៅជាប់នឹងទីប្រជុំជនឈ្មោះថា សារមន្ទីរសកលធម្មជាតិសម្តេចតេជោ ស្ថិតក្នុងភូមិធម្មជាតិសម្តេចតេជោ ឃុំស្រអែម ស្រុកជាំក្សាន្ត ខេត្តព្រះវិហារ ។
សូមបញ្ជាក់ថា នៅក្នុងរណ្តៅកំណាយ ជាមួយលិង្គព្រះឥសូរនេះគេបានប្រទះឃើញបំណែកឧបករណ៍ថ្មកិនថ្នាំបុរាណ១ដុំ ធ្វើពីថ្មភក់ មានបណ្តោយ១៧សង់ទីម៉ែត្រ ទទឹង១៦សង់ទីម៉ែត្រកម្រាស់៤ សង់ទីម៉ែត្រ៕ សហការី
