សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានគ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីមានរថយន្តដឹកបង្គោលភ្លើងមួយគ្រឿង បានបុកជាមួយនឹងរថយន្តដឹកជីមួយគ្រឿងទៀតពេញទំហឹង បណ្តាលឲ្យរថយន្តទាំងសងខាងខ្ទេចយ៉ាងដំណំ ស្ទើរទាំងស្រុង សំណាងណាស់គ្មាននរណាម្នាក់រងរបួសធ្ងន់អ្វីនោះទេ។
ហេតុការណ៍នេះ បានកើតឡើងកាលពីវេលាម៉ោង៦និង៣៥នាទីព្រឹក ថ្ងៃទី៣០ ខែកញ្ញា ឆ្នាំ២០១៧ ស្ថិតនៅតាមបណ្តោយផ្លូវជាតិលេខ២១អា ក្នុងភូមិទៀន សង្កាត់ទៀន ខណ្ឌដង្កោ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញរថយន្តដឹកបង្គោលភ្លើងមួយគ្រឿង ពណ៌លឿង បើកបរក្នុងទិសដៅពីលិចទៅកើត លុះដល់ចំណុចខាងលើស្រាប់តែរថយន្តនេះ បានបើកគេចជង្ហុក ជ្រុលទៅបុកចំពីមុខរថយន្តដឹកជី ពណ៌ស ដែលកំពុងបើកបរបញ្ច្រាសទិសគ្នាពីកើតទៅលិចពេញទំហឹង បណ្តាលឲ្យភាគីខាងរថយន្តដឹកជីដាច់ធ្លាក់កាប៊ីនធ្លាក់មកដី ហើយភ្លាមៗអ្នកបើកបររថយន្តដឹកបង្គោលភ្លើងបានចុះគេចខ្លួនបាត់ស្រមោល បន្សល់ទុកតែរថយន្តទាំង២គ្រឿងនៅកណ្តាលផ្លូវជាតិធ្វើឲ្យកកស្ទះចរាចរណ៍រាប់សិបម៉ោងឯណោះ។
ក្រោយពីកើតហេតុ សមត្ថកិច្ចបានវាស់វែងស្ទូចយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌដង្កោ រងចាំភាគីទាំងសងខាងចូលខ្លួនចរចារគ្នា ដើម្បីបញ្ចប់រឿង ៕ ភារ៉ា ដង្កោ
