សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលខណ្ឌដូនពេញ សហការជាមួយកម្លាំងជំនាញរបស់ការិយាល័យព្រហ្មទណ្ឌកំរិតស្រាលក្រុងភ្នំពេញ ចុះធ្វើការស្រាវជ្រាវរហូតឈានទៅការឃាត់ខ្លួនជនសង្ស័យប្រុសស្រី៣នាក់ជាបន្តបន្ទាប់ ក្រោយក្រុមជនសង្ស័យមានគ្នា៥នាក់ បានធ្វើសកម្មភាពកាប់ជនជាតិជប៉ុនម្នាក់ ប្លន់យកលុយ និងសម្ភារៈ រួចនាំគ្នារត់គេចខ្លួនបានកន្លះខែត្រូវសមត្ថកិច្ចចាប់ខ្លួនបាន៣នាក់ ចំណែកឯបក្ខពួក២នាក់ទៀតរត់គេចខ្លួនបាត់ ។
លោក អុឹម ផល្គុន នាយផ្នែកនគរបាលព្រហ្មទណ្ឌខណ្ឌដូនពេញ បានឲ្យដឹងថា មុនពេលឃាត់ខ្លួនក្រុមជនសង្ស័យខាងលើនេះ គឺនៅថ្ងៃទី១៥ខែកញ្ញា ឆ្នាំ២០១៧ វេលាម៉ោង១០និង៤០នាទីព្រឹក នៅចំណុចកាំជណ្តើរឡើងជាន់ទី១ ប្លុកតាន់ប៉ា ផ្លូវលេខ១៥៤ កែងផ្លូវលេខ៤៩ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ក្រុមចោរប្លន់មានគ្នា៥នាក់ក្នុងនោះស្រីម្នាក់ កំពុងតែធ្វើសកម្មភាពជក់គ្រឿងញៀននៅច្រកឌួងហែមប្លុកតាន់ប៉ា ស្រាប់តែពេលនោះជនរងគ្រោះជាជនជាតិជប៉ុន បានដើរម្នាក់ឯងដើម្បីថតរូបភាព លុះមកដល់ចំណុចកើតហេតុខាងលើ ស្រាប់តែក្រុមជនសង្ស័យស្ទាក់ជនរងគ្រោះនិងប្រើដាវកាប់ទៅលើជនរងគ្រោះជាច្រើនដាវបណ្ដាលឲ្យរងរបួសដើមដៃខាងឆ្វេង, ក្បាល, ម្រាមដៃស្ដាំ និងម្រាមដៃខាងឆ្វេង, រួចប្លន់យកលុយចំនួន២២៧២ដុល្លាអាមេរិក, ២ពាន់ដុល្លាសាំងហ្គាពួរ, កាតATMចំនួន៣ និងទូរស័ព្ទដៃម៉ាកlmobike ចំនួន១ បានសម្រេចក៏នាំគ្នារត់គេចខ្លួន ចំណែកជនរងគ្រោះត្រូវបានប្រជាពលរដ្ឋនៅក្បែរនោះជួយហៅរថយន្តសាមុយដឹកទៅសង្គ្រោះនៅមន្ទីរពេទ្យកាល់ម៉ែតភ្លាមៗផងដែរ ។
លោក អុឹម ផល្គុន នាយផ្នែកនគរបាលព្រហ្មទណ្ឌខណ្ឌដូនពេញ បានបន្តទៀតថា បន្ទាប់ពីកម្លាំងទទួលបានព័ត៌មានថាមានករណីកាប់ប្លន់រួចមកក៏បានធ្វើការស្រាវជ្រាវរហូតឈានទៅដល់ការឃាត់ខ្លួនស្រ្តីម្នាក់ឈ្មោះមុិញ ស្រីនាង ភេទស្រី អាយុ២៥ឆ្នាំ នៅក្នុងវត្តឧណ្ណាលោម សង្កាត់ជ័យជំនះ ខណ្ឌដូនពេញ យកមកសាកសួរដើម្បីរកបក្ខពួក៤នាក់ទៀត ។លុះនៅថ្ងៃទី ៣០ខែ កញ្ញា ឆ្នាំ២០១៧ កម្លាំងជំនាញរបស់ការិយាល័យ សហការជាមួយកម្លាំងអធិការដ្ឋាននគរបាលខណ្ឌដូនពេញ បានស្រាវជ្រាវឃាត់ខ្លួនជនសង្ស័យចំនួន ០២ នាក់ទៀត នៅចំណុច ផ្ទះសំណាក់ហេងហួរ សង្កាត់ផ្សារដេប៉ូ៣ ខណ្ឌទួលគោក ពីបទ លួចមានស្ថានទម្ងន់ទោស ដោយប្រើហិង្សា(កាប់ជនជាតិជប៉ុន ប្លន់យកលុយនិងសម្ភារៈ) កាលពីថ្ងៃទី ១៥-០៩-២០១៧ វេលាម៉ោង ១០,៤៥ នាទី នៅចំណុចកាំជណ្តើរឡើងជាន់ទី១ ប្លុកតាន់ប៉ា ផ្លូវលេខ១៥៤ កែងផ្លូវលេខ៤៩ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ។
ដោយជនសង្ស័យដែលឃាត់ខ្លួនបានទី១ឈ្មោះ រ៉ុង រស្មី ភេទប្រុស ងាយុ ២២ ឆ្នាំ មុខរបរ លក់ដូរ ស្នាក់នៅផ្ទះលេខ៣០៦អឺ៣ ផ្លូវលេខ៥១ សង្កាត់ផ្សារថ្មី៣ ខណ្ឌដូនពេញ , ទី២-ឈ្មោះ ទក ពិសិដ្ឋ ភេទ ប្រុស អាយុ ២៤ ឆ្នាំ ស្នាក់នៅផ្ទះជួល ផ្លូវលំ ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
បច្ចុប្បន្នជនសង្ស័យទាំង៣នាក់ខាងលើ ឃុំខ្លួនបណ្ដោះអាសន្ននៅអ ធិការដ្ឋាននគរបាលខណ្ឌដូនពេញ ដើម្បីកសាងសុំណុំរឿងបញ្ជូនទៅតុលាការតាមនិតិវិធី ៕ស តារា
