សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យពីរនាក់ ដែលធ្វើសកម្មភាពបាញ់សម្លាប់យុវជនម្នាក់និងរងរបួសម្នាក់ ព្រមទាំងបាញ់គំរាមនគរបាលមូលដ្ឋានខណ្ឌច្បារអំពៅ នាអំឡុងខែកក្កដា និងខែសីហា ឆ្នាំ២០១៧ ពេលនេះត្រូវសមត្ថកិច្ចឃាត់ខ្លួនបានហើយ និងបញ្ជូនមកដល់អយ្យការអមសាលាដំបូងរាជធានីភ្នំពេញ នៅព្រឹកថ្ងៃទី១០ ខែតុលា នេះ ដើម្បីចាត់ការតាមច្បាប់ ។
លោក ម៉ៅ សឿត អធិការរងនគរបាលខណ្ឌច្បារអំពៅ ថ្លែងថា ថ្មីៗនេះ កម្លាំងចម្រុះនៃគណៈបញ្ជាការឯកភាពខណ្ឌច្បារអំពៅ ដឹកនាំដោយលោក ណុប ផា អភិបាលរងខណ្ឌ ឃាត់ខ្លួនជនសង្ស័យពីរនាក់ និងដកហូតម៉ូតូមួយគ្រឿងម៉ាកហុងដាឌ្រីមសង់សេ១២៥ ពណ៌ខ្មៅ ស៊េរីឆ្នាំ២០១៦ ពាក់ផ្លាកលេខភ្នំពេញ 1FQ-2854 ។
ជនសង្ស័យឈ្មោះ គឹម សៀងហៃ អាយុ១៧ឆ្នាំ និងឈ្មោះ ជា ជ័យសំណាង ហៅតឿ អាយុ២៥ឆ្នាំ ។
លោក លោក ម៉ៅ សឿត បញ្ជាក់ថា ជនសង្ស័យទាំងពីរនាក់ បានធ្វើសកម្មភាពប៉ុនប៉ងឃាតកម្ម ដោយប្រើអាវុធខ្លីម៉ាកប៉េ អាកុលបាញ់គម្រាមសម្លាប់ទៅលើជនរងគ្រោះ ឈ្មោះ ឯក ជីវន្ត អាយុ១៨ឆ្នំា មុខរបរនៅផ្ទះ ស្នាក់នៅភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល កាលពីថ្ងៃទី០១ កក្កដា ឆ្នាំ២០១៧ នៅចំណុចមុខផ្ទះគ្មានលេខ ផ្លូវបេតុង ភូមិយកបាត្រ សង្កាត់ក្បាលកោះ ខណ្ឌច្បារអំពៅ។
សកម្មភាពទី២ កាលពីថ្ងៃទី២២ ខែកក្កដា ឆ្នាំ២០១៧ បានប្រព្រឹត្តអំពើឃាតកម្ម ប្រើអាវុធប៉េអាកុលបាញ់ទៅលើជនរងគ្រោះ ឈ្មោះ វ៉ាន់ បញ្ញា អាយុ២៤ឆ្នាំ មុខរបរជាងសំណង់ ។
លោក ម៉ៅ សឿត បានបញ្ជាក់ទៀត លុះដល់ថ្ងៃទី១៨ ខែសីហា ឆ្នាំ២០១៧ ជនសង្ស័យទាំងពីរនាក់ ប្រើអាវុធខ្លីម៉ាក K59 បាញ់ទៅលើសមត្ថកិច្ចនគរបាលប៉ុស្តិ៍ក្បាលកោះ នៅចំណុចមុខវត្តវិចិត្តារាម ផ្លូវបេតុង ភូមិយកបាត្រ១ សង្កាត់ក្បាលកោះ ខណ្ឌច្បារអំពៅ ។ លុះដល់ថ្ងៃទី២៥ ខែសីហា ឆ្នាំ២០១៧ ជនសង្ស័យម្នាក់ឈ្មោះ គឹម សៀងហៃ ប្រើអាវុធខ្លីម៉ាក K59 បាញ់ទៅលើសមត្ថកិច្ចនគរបាលប៉ុស្តិ៍ក្បាលកោះ នៅចំណុចមុខផ្ទះគ្មានលេខ ផ្លូវ បេតុង ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ៕ ចេស្តា
