សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅព្រឹកថ្ងៃទី១០ ខែតុលា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីប្រកាសផ្សព្វផ្សាយ និងដាក់អោយអនុវត្តគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈឆ្នាំ២០១៧-២០២៥ ដែលបានធ្វើឡើងនៅវិមានសន្តិភាព រាជធានីភ្នំពេញ។
សម្តេចតេជោនាយករដ្ឋមន្ត្រី បានសំដែងនូវការកោតសរសើរចំពោះក្រសួងការងារ និងបណ្តុះបណ្តាលវិជ្ជាជីវៈ ដែលបានដឹកនាំសម្របសម្រួលរៀបចំគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០១៥ ដ៏មានសារៈសំខាន់នេះឡើង និងបានវាយតម្លៃខ្ពស់លើការចូលរួមពីគ្រប់ក្រសួង ស្ថាប័ន ព្រមទាំងដៃគូរអភវិឌ្ឍន៍ ជាពិសេសធានាគាអភវិឌ្ឍន៍អាស៊ីដែលបានគាំទ្រ និងផ្តល់កិច្ចសហការដល់ការខិតខំប្រឹងប្រែងរួមគ្នាក្នុងការរៀបចំគោលនយោបាយជាតិនេះឡើងរហូតទទួលបានជោគជ័យ។
ការរៀបចំរៀប និងដាក់ចេញនូវគោលនយោបាយជាតិស្តីពីរការអប់រំបណ្តុះបណ្តាលបច្ចេកទេស និងវិជ្ជាជីវៈឆ្នាំ២០១៧-២០២៥ បានគូសបញ្ជាក់ពីភាពចាំបាច់ក្នុងការបង្កើតយុទ្ធសាស្ត្រនៃការអប់រំបណ្តុះបណ្តាលបច្ចេកទេសវិជ្ជាជីវៈដល់កម្លាំងពលកម្មដើម្បីឆ្លើយតបទៅនឹងតម្រូវការទីផ្សារការងារ ជាពិសេសរួមចំណែកក្នុងការអភិវឌ្ឍនវិស័យឧស្សាហកម្ម និងបង្កើតការងារសមរម្យ ព្រមទាំងធានាគុណភាព និងផលិតភាពខ្ពស់របស់កម្លាំងពលកម្មដែលអាចប្រកួតប្រជែងកាន់តែប្រសើរជាងមុនជាមួយបណ្តាប្រទេសក្នុងតំបន់។
សម្តេចតេជោ ហ៊ុន សែន បានផ្តល់អនុសាសន៍សំខាន់ចំនួន ៧ ដូចជា៖
១) ត្រូវបន្តពង្រឹងគុណភាពនៃការអប់រំ បណ្តុះបណ្តាលបច្ចេកទេស និងវិជ្ជាជីវៈ ដោយបន្តអនុវត្តប្រព័ន្ធធនាគារ ប្រព័ន្ធធានាគុណភាព និងពង្រីកសមត្ថភាពបច្ចេកទេសគ្រូបណ្តុះបណ្តាល ដើម្បីឆ្លើយតបទៅនឹងការអភិវឌ្ឍបច្ចេកវិទ្យាថ្មីៗស្របនឹងតម្រូវការទីផ្សារការងារបច្ចុប្បន្នផងដែរ។
២)ត្រូវបន្តកែលំអរ ប្រព័ន្ធគ្រប់គ្រង់ព័ត៌មានអប់រំ បណ្តុះបណ្តលបច្ចេកទេសវិជ្ជាជីវៈ និងពង្រីកប្រព័ន្ធព័ត៌មានទីផ្សារការងារ យកចិត្តទុកដាក់បង្កើនកម្លាំពលកម្ម និង ពង្រឹងនិងពង្រីកទិន្ន័យទីផ្សារការងារអោយបានល្អ។
៣) ត្រូវបន្តពង្រឹង និង ពង្រីកទីភ្នាក់ងារជាតិមុខរបបរ និងការងារដើម្បីអោយទីផ្សារការងារកាន់តែទូលំទូលាយ។
៤) ត្រូវបង្កើនឱកាសបន្ថែមទៀតដល់ប្រជាជនដើម្បីទទួលបាននូវជំនាញសម្រាប់ជីវិតដោយយកចិត្តទុក្ខដាក់ ជាពិសេសលើស្ត្រី ជនរងគ្រោះ យុវជនទីទាល់ក្រ សិស្សដែលបានបោះបងការសិក្សា ពលករចំណាក ស្រុក និង ជនជាតិភាគតិច ដើម្បីបណ្តុះបណ្តាលអោយមានចំណេះជំនាញ។
៥) បង្កភាពងាយស្រួលក្នុងការទំនាក់ទំនងដល់សិស្សនិស្សិត រវាងប្រពន្ធ័អប់រំទូទៅ និង ប្រពន្ធ័អប់រំបណ្តុះបណ្តាលបច្ចេកទេសវិជ្ជាជីវៈ ដោយត្រូវផ្តល់អាហារូបករណ៍ ប្រាក់ឧបត្ថម និងកន្លែងស្នាក់នៅអោយបានគ្រប់គ្រាន់ នឹងលើកទឹកចិត្តដល់សិស្សនិស្សិតអោយមកចូលមកសិក្សានៅក្នុងប្រព័ន្ធបណ្តុះបណ្តាលបច្ចេកទេសវិជ្ជាជីវៈអោយកាន់តែច្រើនឡើង។
៦)ត្រូវលើកទឹកចិត្តភាពជាដៃគូរវាងរដ្ន និងឯកជន អោយចូលរួមក្នុងការអភិវឌ្ឍប្រព័ន្ធអប់រំបណ្តុះបណ្តាលបច្ចេកទេស និង វិជ្ជាជីវៈ ហើយបន្តសហការជាមួយអង្គការក្រៅរដ្ឋាភិបាល និងគម្រោងដៃគូអភិវឌ្ឍនានាទាំងក្នុងក្របខ័ណ្ឌ និងពហុភាគី ដែលជាប់ពាក់ព័ន្ធដើម្បីចូលរួមអភិវឌ្ឍន៍ប្រព័ន្ធអប់រំបណ្តុះបណ្តាលវិជ្ជាជីវៈនេះ។
៧) ត្រូវបំផុសនូវយុទ្ធនាការ បង្កើនផលិតភាពការងារ ទិន្នផលការងារ និងប្រសិទ្ធភាពការងារ ដើម្បីឆ្លើយតបទៅនឹងការប្រកួតប្រជែងនៅក្នុងការទាក់ទាញវិនិយោគ និងការកើនឡើងនូវប្រាក់ឈ្នួលអប្បរមា។
នៅក្នុងឱកាសនោះដែរ សម្តេចតេជោ ហ៊ុន សែន បានមានប្រសាសន៍សាជារថ្មីអំពីការប្រកាសជាផ្លូវការនូវគោលនយោបាយជាតិគាំពារសង្គមដែលផ្តោតទៅលើស្រ្តីឆ្លងទន្លេដែលជាកម្មការនីដែលសម្រាលបានកូន ១ គឺទទួលបានប្រាក់ឧបត្ថម្ភ ៤០០,០០០៛ កូនភ្លោះ២គឺបាន ៨០០,០០០៛ កូនភ្លោះ៣ គឺបាន ១,២០០,០០០៛។ បើតាមសេចក្តីសម្រេច (លេខ៥២ សសរ) ដែលបានចុះហត្ថលេខាកាលពីថ្ងៃ ២ធ្នូ ឆ្នាំ ២០០៥ ដែលបានអនុវត្តកាលពីថ្ងៃទី ១ មករា ២០០៦ គឺស្រ្តីជាមន្រ្តីរាជការដែលសម្រាលកូនគឺក្នុង១នាក់ ៦០០,០០០រៀល។ ប៉ុន្តែនៅពេលនេះ គឺរាជរដ្ឋាភិបាលបានបញ្ចូលស្រ្តីដែលជាកងទ័ព និងស្រ្តីជាកងនគរបាលជាតិដែលសម្រាលកូន គឺចាប់ពីខែ មករា ឆ្នាំ ២០១៨ នេះទៅ ស្រ្តីជាមន្រ្តីរាជការស៊ីវិល នគរបាល និងកងទ័ពដែលសម្រាលកូន១គឺទទួលបាន ៨០០,០០០៛ បើបានកូនភ្លោះ២គឺទទួលបាន ១,៦០០,០០០៛ បើបានកូនភ្លោះ៣ គឺទទួលបាន ២,៤០០,០០០៛ ។ ចំពោះគ្រូបង្រៀន និងគ្រូពេទ្យជាស្រ្តី ក៏ទទួលបានប្រាក់ឧបត្ថម្ភដូចខាងលើនេះដែរ។
នាឱកាសនេះ សម្តេចតេជោ ហ៊ុន សែន សូមអរគុណចំពោះ ក្រសួងការងារ និងបណ្តុះបណ្តាលវិជ្ជាជីវៈ និងបណ្តាលរោងចក្រសហគ្រាសទាំងអស់ដែលបានពិភាក្សាចរចារតម្លើងប្រាក់ខែសម្រាប់កម្មករកម្មការិនី គឺចាប់ពីខែមករា ឆ្នាំ២០១៨ តទៅ ប្រាក់ខែកម្មករកម្មរិនីជាអប្បរិមារគឺ ១៧០ ដុល្លារ ក្នុងមួយខែ (គឺរាជរដ្ឋាភិបាលបានបន្ថែម ៥ដុល្លារ) ដែលសាច់ប្រាក់នេះបានមកពីពន្ធកាត់ទុក និងពីកំរៃនៃការពិនិត្យការនាំចេញ ដែលររាជរដ្ឋាភិបាលត្រូវចំណាយជាង ៤០ លានដុល្លារសហរដ្ឋអាមេរិក។ ដូច្នេះចាប់ពីខែ មករា ឆ្នាំពី ២០១៨ តទៅ ប្រាក់ខែអប្បរិមារបូកបន្ថែមនឹងប្រាក់អត្ថប្រយោជន៍ផ្សេងៗ រួមទាំងការបញ្ចុះតំលៃទឹកភ្លើង និងថ្លៃឈ្នួលផ្ទះកម្មករ គឺបងប្អូនកូនក្មួយកម្មករអាចនៅសល់ប្រាក់ខែសមរម្យសម្រាប់ដោះស្រាយជីវភាពរស់នៅកាន់តែប្រសើរឡើង។
សម្តេចតេជោ ហ៊ុន សែន បានបញ្ជាក់ថា កាលពីមុនប្រាក់ខែមន្ត្រីរាជការ លើលពី ១លានរៀល ត្រូវជាប់ពន្ធទាំងអស់ ប៉ុន្តែចាប់ពី ខែ មករា ឆ្នាំ២០១៨ តទៅ ប្រាក់ខែចាប់ពី ១,២០០,០០០៛ ទើបជាប់ពន្ធ ហើយសម្រាប់ប្រាក់បៀរវត្សន៍មន្ត្រីទាបបំផុតគឺទទួលបាន ១ លានរៀល។ សម្តេចតេជោ ក៏បានបញ្ជាក់សារជាថ្មីផងដែរ ចំពោះកីឡាករ កីឡាការិនីទាំងអស់គឺនឹងទទួលបានការជិះរថយន្តក្រុងសាធារណៈដោយមិនគិតថ្លៃ ចាប់ពីខែមករា ឆ្នាំ ២០១៨ នេះទៅ។
សម្តេចតេជោ ហ៊ុន សែន ក៏បញ្ចាក់ផងដែរថា ចំពោះមន្ត្រីរាជការស៊ីវិលដែលទទួលមរណៈភាពដោយជំងឺធម្មតាដែលពីមុនទទួលបាន ១,២០០,០០០៛ ប៉ុន្តែពេលនេះគឺបន្ថែមប្រាក់ដល់ ២,០០០,០០០៛ ។ រីឯចំពោះមន្ត្រីរាជការដែលទទួលមណៈភាពក្នុងបេសកកម្មដែលពីមុនទទួលបាន ១,៥០០,០០០៛ នឹងបន្ថែមដល់ ៤,០០០,០០០៛ សម្រាប់ចាប់ខែមករា ឆ្នាំ ២០១៨ ខាងមុខនេះ។
ចុងក្រោយសម្តេចតេជោនាយករដ្ឋមន្រ្តី បានអំពាវនាវអោយស្ថាប័នពាក់ព័ន្ធទាំងអស់ក្នុងការអនុវត្តន៍គោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ រួមគ្នាជំរុញវិស័យនេះអោយកាន់តែទូលំទូលាយ នឹងមានគុណភាពការងារជាមួយនឹងការប្រកួតប្រជែងដែលបំពេញនូវតម្រូវការងារនាពេលបច្ចុប្បន្ន នឹងក្នុងពេលអនាគត។
មុននឹងបិទកម្មវិធី សម្តេចតេជោ ហ៊ុន សែន នាយករដ្ឋមន្រ្តី បានប្រគល់សៀវភៅគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ២០១៧-២០២៥ ជូន ឯឧ អ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈដើម្បីអនុវត្តចាប់ពីពេលនេះតទៅ៕
រូបភាព៖ ហ្វេសប៊ុកសម្តេចតេជោ
