សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ជនសង្ស័យម្នាក់ត្រូវសមត្ថកិច្ចតាមប្រមាញ់ចាប់ខ្លួន ក្រោយពីធ្វើសកម្មភាពលួចកាច់សោរ.កម៉ូតូ ១គ្រឿង បានសម្រេច និងបានផ្ទុះអាវុធបាញ់ទៅលើសមត្ថកិច្ច ៤គ្រាប់ នៅចំណុចភូមិកូនសាត់ ឃុំត្រពាំងធំ ស្រុកប្រាសាទបាគង ខេត្តសៀមរាប នៅវេលាម៉ោង ៨ ព្រឹក ថ្ងៃទី០៨ ខែវិច្ឆិកា ឆ្នាំ២០១៧ ។
សមត្ថកិច្ចបានឲ្យដឹងថា ជនសង្ស័យមានឈ្មោះ ណុប វីរៈ ភេទប្រុស អាយុ ២៦ឆ្នាំ នៅភូមិអណ្តូងស្នាយ ឃុំអណ្តូងស្នាយ ស្រុកជើងព្រៃ ខេត្តកំពង់ចាម។ ចំណែកជនរងគ្រោះឈ្មោះ ចាប ចិន ភេទប្រុស អាយុ ៦២ឆ្នាំ រស់នៅភូមិកូនសាត់ ឃុំត្រពាំងធំ ស្រុកប្រាសាទបាគង រីឯម៉ូតូដែលជនសង្ស័យលួចទៅម៉ាក C125 សេរី២០១៧ ពណ៌ខ្មៅ គ្មានស្លាកលេខ។
ប្រភពពីសមត្ថកិច្ចដដែលបន្តថា ពេលធ្វើសកម្មភាពរួច ជនសង្ស័យបានគេចខ្លួនដោយជិះម៉ូតូមកទិសខាងលិច រហូតដល់ចំណុចខាងជើងសាលាស្រុកប្រាសាទបាគង ក៏ត្រូវសមត្ថកិច្ចតាមមក ហើយជនសង្ស័យបានបាញ់មកលើសមត្ថកិច្ច ចំនួន ៤គ្រាប់ ទើបសមត្ថកិច្ចធ្វើការបាញ់តបត ១គ្រាប់ ចំដៃខាងស្តាំ រួចជនសង្ស័យបានរត់ចូលព្រៃ។ ភ្លាមៗនោះ សមត្ថកិច្ចបានធ្វើការឡោមព័ទ្ធ និងចាប់ខ្លួនបានតែម្តង ព្រមទាំងរឹបអូសវត្ថុតាងម៉ូតូខាងលេី និងកាំភ្លើងខ្លីម៉ាក K៥៩ ចំនួន ១ដើម ហើយបញ្ជូនខ្លួនមកកាន់ការអធិការដ្ឋាននគរបាលស្រុកប្រសាទបាគង ដើម្បីសាកសួរ និងរៀបចំសំណុំរឿងបញ្ជូនមកការិយាល័យជំនាញអនុវត្តទៅតាមច្បាប់ ៕
