សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ តៃកុងឡានធុនធំអមដោយកំប៉ុងស្រាបៀរកម្ពុជា បានបេីកបុករថយន្តធុនធំមួយទៀតដែលមានទិសដៅបញ្ច្រាសគ្នាបណ្តាលឲ្យអ្នកបើកបរបាក់ជើង ។
ហេតុការណ៍នេះកើតឡើងនៅវេលាម៉ោងរំលងអធ្រាតត្រ ឈានចូលថ្ងៃទី១១ ខែវិច្ឆិកា ឆ្នាំ២០១៧ នៅលើផ្លូវជាតិលេខ៤ ចន្លោះគីឡូម៉ែត្រ ១៧៣-១៧៤ ស្ថិតនៅក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។
តាមប្រភពព័ត៌មានពីកន្លែងកើតហេតុបានឲ្យអ្នកយកព័ត៌មានកាសែតនគរវត្តដឹងថា គ្រោះថ្នាក់ចរាចរណ៍នេះ កើតកើតឡើងបង្កដោយរថយន្តធុនធំមួយគ្រឿងម៉ាក FUSO ពណ៌ស ពាក់ស្លាកលេខ កំពង់ធំ3A-1687 បើកបរដោយឈ្មោះ ជឿន សុខុន ភេទ ប្រុស អាយុ ៣២ឆ្នាំ មុខរបរអ្នកបើកបរ មានទីលំនៅខេត្តត្បូងឃ្មុំ មានទិសដៅពីភ្នំពេញ ឆ្ពោះមក ខេត្តព្រះសីហនុ លុះដល់ចំណុចខាងលើ ក៏បានរេចង្កូតមកខាងឆ្វេងដៃ បុកកៀរពីចំហៀង រថយន្តធុនធំមួយគ្រឿងទៀត ពណ៌ក្រហម ពាក់ស្លាកលេខព្រះសីហនុ3A-2886 ជាកម្មសិទ្ធរបស់ ក្រុមហ៊ុន មុំ សម្ផស្ស បើកបរដោយឈ្មោះ ងឹម វ៉ា ភេទប្រុស អាយុ ២៨ឆ្នាំ មុខរបរ បើកបររថយន្ត មានទីលំនៅស្រុកសង្កែ ខេត្តបាត់ដំបង ដែលមានទិសដៅបញ្រ្ចាសគ្នា។
ប្រភពដដែលបានបន្តទៀតថា គ្រោះថ្នាក់នេះបណ្ដាលឲ្យរងរបួសបាក់ជើងឆ្វេងមនុស្សមួយនាក់ ឈ្មោះ ជឿន សុខុន អ្នកបើករថយន្តFUSO បានបញ្ជូនទៅព្យាបាលនៅគ្លីនិកលិគឹមឌី វាលរេញ។
បច្ចុប្បន្នវត្ថុតាងរថយន្តទាំង២គ្រឿង បានយកមករក្សាទុកនៅអធិការដ្ឋាននគរបាលស្រុកព្រៃនប់រង់ចាំការដោះស្រាយទៅតាមផ្លូវច្បាប់៕ ឆ្លាម សមុទ្រ
