សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចចម្រុះខណ្ឌសែនសុខបានឃាត់ខ្លួនជនសង្ស័យ៧នាក់ និងដកហូតថ្នាំញៀន៣កញ្ចប់ ខណៈកំពុងដាក់គោលដៅត្រួតពិនិត្យអាវុធជាតិផ្ទុះដើម្បីទប់ស្កាត់បទល្មើសក្នុងមូលដ្ឋាន។ កាលពីវេលាម៉ោង៧និង៣០នាទីយប់ ថ្ងៃទី២០ ខែវិច្ឆិកា ឆ្នាំ២០១៧ នៅចំណុចមុខប៉ុស្តិ៍នគរបាលរដ្ឋបាលទឹកថ្លា តាមបណ្តោយផ្លូវភ្នំពេញ ហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រតិបត្តិការនេះដឹកនាំដោយលោក មូវ ម៉ានិត អភិបាលនៃគណះអភិបាលខណ្ឌសែនសុខ លោក អ៊ឹម សុខុម អធិការរងខណ្ឌ តំណាងលោក វរសេនីយ៍ឯក ម៉ក់ ហុង អធិការនគរបាលខណ្ឌ និងកម្លាំងកងរាជអាវុធហត្ថ និងសមត្ថកិច្ចពាក់ព័ន្ធជាច្រើននាក់ទៀត។
លោក មូវ ម៉ានិត អភិបាលខណ្ឌ បានមានប្រសាន៍ថា ការដាក់គោលដៅត្រួតពិនិត្យអាវុធជាតិផ្ទុះនេះ គឺដើម្បីទប់ស្កាត់បទល្មើស ដែលអាចកើតមានឡើងក្នុងមូលដ្ឋាន។ ជាលទ្ធផលក្នុងការដាក់គោលដៅ ត្រួតពិនិត្យអាវុធជាតិផ្ទុះខាងលើ គណៈបញ្ជាការកងឯកភាពខណ្ឌបានឃាត់ខ្លួនជនសង្ស័យ៧នាក់ រួមទាំងថ្នាំញៀនពីរកញ្ចប់តូច និងមួយកញ្ចប់ធំល្មមក្នុងបីករណី បន្ទាប់ពីមានការសង្ស័យហើយ ក៏ហៅត្រួតពិនិត្យនិងឆែកឆេរ។
ករណីទី១ឃាត់ខ្លួនជនសង្ស័យ២នាក់ ១ឈ្មោះ ហៃ ឡាង ភេទប្រុស អាយុ២០ឆ្នាំ មុខរបរជាងដែក ស្នាក់នៅសង្កាត់កាកាប ខណ្ឌពោធិសែនជ័យ។ ២ ឈ្មោះ ឃុន ចាន់រស្មី ភេទប្រុស អាយុ២០ឆ្នាំ មុខរបរជាងដែក ស្នាក់នៅម្តុំកាណាឌីយ៉ា សង្កាត់ចោមចៅ ខណ្ឌពោធិសែនជ័យ។ ក្នុងនោះដកហូតម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ សេរី០១៥ ពាក់ស្លាកលេខភ្នំពេញ 1AI-1704 បន្ទាប់ពីឆែកឆេររកឃើញថ្នាំញៀនមួយកញ្ចប់តូច។
ករណីទី២ ឃាត់ខ្លួនជនសង្ស័យ២នាក់ ទី១ មានឈ្មោះ ម៉ែន សៀន ភេទប្រុស អាយុ២២ឆ្នាំ មុខរបរកម្មកររោងចក្រ ស្នាក់នៅភូមិស្លែងរំលើង សង្កាត់ទឹកថ្លា ខណ្ឌសែនសុខ។ ទីពីរមានឈ្មោះ សេរី ចំនាន ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិជាមួយគ្នា និងដកហូតម៉ូតូមួយគ្រឿងម៉ាក ស្មាសរេវ៉ូ ពណ៌ខ្មៅ ពាក់ស្លាកលេខ ភ្នំពេញ 1E-9804 បន្ទាប់ពីរឆែកឆេររកឃើញថ្នាំញៀនមួយកញ្ចប់តូច។
ករណីទី៣ ឃាត់ខ្លួនជនសង្ស័យ៣នាក់ ទី១ មានឈ្មោះ អ៊ូ សុភក្រ្ត័ ភេទប្រុស អាយុ២៦ឆ្នាំ មុខរបររត់ម៉ូតូឌុប ស្នាក់នៅភូមិចុងថ្នល់ខាងកើត សង្កាត់អូរបែកក្អម ខណ្ឌសែនសុខ។ ទី២មានឈ្មោះ មិត្ត សុជាតិ ភេទប្រុស អាយុ១៨ឆ្នាំ មុខរបរកម្មករសំណង់ ស្នាក់នៅភូមិបុរី១០០ខ្នង សង្កាត់ទឹកថ្លា ខណ្ឌសែនសុខ។ ទី៣ឈ្មោះ មិត្ត ចិន្ដា ភេទប្រុស អាយុ១៧ឆ្នាំ មុខរបរកម្មករសំណង់ ស្នាក់នៅជាមួយគ្នា និងដកហូតម៉ូតូមួយគ្រឿងម៉ាក ហុងដាវ៉េវ ពណ៌ខ្មៅ ពាក់ស្លាកលេខភ្នំពេញ 1P-2012 បន្ទាប់ពីរឆែកឆេររកឃើញថ្នាំញៀនមួយកញ្ចប់ធំល្មម។
បច្ចុប្បន្នជនសង្ស័យទាំង៧នាក់ខាងលើ រួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលទឹកថ្លាកសាងសំណុំរឿងបញ្ជូនទៅអធិការដ្ឋាននគរបាលខណ្ឌសែនសុខដើម្បីរង់ចាំចាត់ការទៅតាមច្បាប់ ៕ តុង សីហា
