សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ក្រុមជនសង្ស័យមួយក្រុម ដែលជាមុខសញ្ញាគាស់ផ្ទះ ត្រូវបានសមត្ថកិច្ចក្របួចបានជាបន្តបន្ទាប់ ក្រោយពេលធ្វើសកម្មភាពគាស់ផ្ទះលក់ចាប់ហួយបានជាងមួយខែរួចមក។ ក្រោយឃាត់ខ្លួនក្រុមជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការចាត់ការបន្ត។
ប្រភពពីនគរបាលបានឲ្យដឹងថាកាលពីវេលាម៉ោង១៥និង៣០នាទីនៅថ្ងៃទី២៧ ខែវិច្ឆិកា ឆ្នាំ២០១៧ ក្រោយស្រាវជ្រាវ អស់រយៈពេលជាងមួយខែរួចមក សមត្ថកិច្ចឃាត់ខ្លួនជនសង្សយ័ម្នាក់ឈ្មោះកែវ នី ភេទស្រី អាយុ៣៩ ឆ្នាំ មានទីលំនៅភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឹ ។ ជនសង្ស័យរូបនេះជាប់សង្ស័យក្នុងករណី គាស់ផ្ទះកាលពីម៉ោង១រំលងអធ្រាត្រឈានចូលថ្ងៃទី២ ខែតុលា ឆ្នាំ២០១៧ មានម្ចាស់ឈ្មោះមឿន សោភា ភេទស្រី អាយុ៤០ឆ្នាំ នៅភូមិរលាំងសង្កែ សង្កាត់សុព័រទេព ក្រុងច្បារមន។ ក្នុងពេលធ្វើសកម្មភាពនោះ ជនសង្ស័យនិងបក្ខពួកយកអស់់ស្រាបៀរ៣០កេះ ទឺកសុទ្ធ៨កេះ។
នៅចំពោះមុខសមត្ថកិច្ច ជនសង្ស័យឆ្លើយសារភាពថា ខ្លួនពិតជាបានប្រព្រឹត្តដូចការលើកឡើងមែន ពេលធ្វើសកម្មភាពនោះដែរ គេមានបក្ខពួកចំនួន៤នាក់ទៀត ចូលរូមជាមួយគ្នា។
ដោយបានស្តាប់ចម្លើយសារភាពរួចមក នៅព្រឹកថ្ងៃទី២៨ ខែវិច្ឆិកា ឆ្នាំ២០១៧ សមត្ថកិចបន្តឃាត់ខ្លួនអ្នកពាក់ព័ន្ធបាន៤នាក់ទៀត នៅភូមិក្រាំងពលទេព ឃុំរការធំ ដែលមានឈ្មោះ ងួន មេសា អាយុ១៩ឆ្នាំ ឈ្មោះកា ដាវី អាយុ២០ឆ្នាំជាប្រពន្ធ ឈ្មោះខឹម ទូច ភេទស្រី អាយុ៦០ឆ្នាំ និងឈ្មោះអ៊ុំ ស្រីនាង ភេទស្រី អាយុ២៥ឆ្នាំ។
ក្រោយឃាត់ខ្លួន សមត្ថកិច្ចបានកសាងសំណុំរឿងដើម្បីបញ្ជូនជនសង្ស័យទាំងនេះទៅកាន់សាលាដំបូងខេត្តចាត់ការបន្តតាមនីតិវិធី៕ សេនាស័ក្តិ
