សារព័ត៌មាន នគរវត្ត តែងតែនាំមុខគេជានិច្ច
បន្ទាយមានជ័យ: បុរសម្នាក់បានអង្គុយស្លាប់លើកៅអីគ្មានអ្នកដឹង ខណៈជិះក្នុងរថយន្តក្រុង របស់ក្រុមហ៊ុនKSO ធ្វើឲ្យភ្ញាក់ផ្អើលនៅពេលដែលរថយន្តបើកបរមកដល់ចំណុចភូមិអូរស្ងួត ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ ក្នុងអំឡុងម៉ោង ១០យប់ថ្ងៃពុធ៤កើតខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២០ ខែធ្នូ ឆ្នាំ២០១៧ កន្លងទៅនេះ ។
បុរសដែលបានស្លាប់លើរថយន្តក្រុងខាងលើនេះមានឈ្មោះ តាំង វឿន អាយុ ៤៤ឆ្នាំ រស់នៅក្នុងភូមិ អាងសិលា ឃុំអូបីជាន់ ស្រុកអូរជ្រៅ។ បើតាមការរៀបរាប់ពីអ្នកបើកបររថយន្តក្រុងខាងលើ បាននិយាយថា បុរសដែលស្លាប់នេះបានធ្វើដំណើរចេញពីរាជធានីភ្នំពេញ ឆ្ពោះមកកាន់ខេត្តបន្ទាយមានជ័យ។ លុះធ្វើដំណើរមកដល់ចំណុចកើតហេតុ ស្រាប់តែបុរសរូបនេះបានដាច់ខ្យល់ស្លាប់ហើយធ្លាក់ក្បាលមកលើដៃលោកតាអាយុ៧០ឆ្នាំម្នាក់ដែលអង្គុយក្បែរ បង្កការឆោឡោផ្អើលពេញរថយន្តក្រុង តែម្តង ។
បន្ទាប់មកទើបគេរាយការណ៍ប្រាប់សមត្ថកិច្ចនគរបាលមូលដ្ឋាន និងសមត្ថកិច្ចជំនាញ ចុះទៅ ដល់ធ្វើកោសល្យវិច័យ ហើយបានសន្និដ្ឋានថា ជនរងគ្រោះស្លាប់ដោយគាំងបេះដូង(ខ្យល់គរ) ហើយបានយកសពយកទៅដាក់ក្នុងវត្ត ស្រាវជ្រាវរកក្រុមគ្រួសារមកទទួលយកទៅធ្វើបុណ្យ តាមប្រពៃណី ៕ សហការី
