សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់រងរបួសធ្ងន់ស្រាលត្រូវបានបញ្ជូនទៅសង្គ្រោះភ្លាមៗ ខណៈដែលជិះម៉ូតូឌុបគ្នាហើយត្រូវបានបុរសជនជាតិចិន ២នាក់ស្រវឹងស្រាបើករថយន្តបុកបណ្តាលឲ្យរងរបួសធ្ងន់ម្នាក់ និងស្រាលម្នាក់។
ហេតុការណ៍នេះ កើតឡើងកាលវេលាម៉ោង១០និង១៥នាទីយប់ ថ្ងៃពុធ ៩រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១០ ខែមករា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៣ ទល់មុខបុរី ប៊ុនហួរក្នុងភូមិព្រៃព្រីងខាងត្បូងសង្កាត់ចោមចៅ២ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនរងគ្រោះ២នាក់ ជិះម៉ូតូមួយគ្រឿងWAVEពណ៌ផ្ទៃមេឃលាយស ពាក់ស្លាកលេខភ្នំពេញ1I-6631ធ្វើដំណើរតាមបណ្ដោយផ្លូវជាតិលេខ៣ក្នុងទិសដៅពីត្បូងទៅជើង ។ លុះដល់ចំណុចកើតហេតុស្រាប់តែមានរថយន្តបង្ក ម៉ាកTUNDRA ពណ៌ខ្មៅពាក់ស្លាកលេខភ្នំពេញ 2S-3807បើកបរដោយជនជាតិចិនរេចង្កូត មកផ្នែកខាងឆ្វេងបុកម៉ូតូជនរងគ្រោះចំហៀងផ្នែកខាងឆ្វេងបណ្ដាលឲ្យជនរងគ្រោះដួលបោកនឹងថ្នល់រងរបួសធ្ងន់ម្នាក់ និងស្រាលម្នាក។
ភ្លាមៗជនរងគ្រោះទាំង២នាក់ ត្រូវបានរថយន្តសង្គ្រោះ ដឹកយកទៅព្យាបាលផងដែរ។ បន្ទាប់ពីជនរងគ្រោះទៅមន្ទីរពេទ្យកម្លាំងនគរបាលប៉ុស្តិ៍ចោមចៅ 2 បានមកអន្តរាគមន៍ នៅកន្លែងកើតហេតុ ព្រមទាំងទំនាក់ទំនងទៅនគរបាលជំនាញចរាចរណ៍ ខណ្ឌពោធិ៍សែនជ័យ ធ្វើការវាស់វែងយកម៉ូតូ និងរថយន្តបង្កខាងលើយកទៅរក្សាទុករង់ចាំការដោះស្រាយនៅពេលក្រោយ ៕ សុខាសែនជ័យ
