សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍គ្រោះចរាចរណ៍មួយបានកើតឡើង បន្ទាប់ពីបុរសជនជាតិចិនម្នាក់ស្រវឹងស្រាជោកជាំ បើករថយន្តបុកម៉ូតូ និងរ៉ឹម៉កម៉ូតូកង់បីជាច្រើនគ្រឿង រួចបើករត់បន្តទៅបុករថយន្តពីរបីគ្រឿងទៀត នៅមិនព្រមឈប់ ហើយព្យាយាមបើករត់រហូតទៅទាក់នឹងបង្កាន់ដៃស្ពានអាកាសថ្មី ដែលសាងសង់ពុំទាន់រួច បណ្តាលអោយរថយន្តបើកទៅមុខលែងរួច ប៊ិះធ្លាក់ចុះពីលើស្ពាន បង្កការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចដេញតាម ស្ថិតក្នុងសង្កាត់ទឹកថ្លា ខណ្ឌសែនសុខ ។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៥ ព្រឹកព្រលឹមថ្ងៃសុក្រ ២រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២ ខែកុម្ភៈ ឆ្នាំ២០១៨នេះ ស្ថិតនៅចំណុចផ្សារដើមគ សង្កាត់ផ្សារដើមគ ខណ្ឌទួលគោក ប៉ុន្តែសមត្ថកិច្ចដេញតាមបាន ស្ថិតក្នុងសង្កាត់ទឹកថ្លា ខណ្ឌសែនសុខ ។
មុនកើតហេតុគេបានឃើញបុរសជនជាតិម្នាក់ស្រវឹងស្រាជោកជាំ បើករថយន្តហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ 2AJ-4109 លុះពេលធ្វើដំណើរមកដល់ម្តុំផ្សារដើមគ ក៏រេចង្កូតពេញផ្លូវជ្រុលទៅបុកម៉ូតូ និងរ៉ឺម៉កកង់បីជាច្រើនគ្រឿង ហើយបានបន្ថែមល្បឿនបើករត់រហូតបានបើកទៅបុករថយន្តកាមរី ១គ្រឿងទៀត ពណ៌ស ដែលពាក់ស្លាកលេខ ភ្នំពេញ 2AD-3133 ។
រថយន្តបង្កមិនបានឈប់ទេ គឺបានបើកបន្ដទៅបុករថយន្តធុនត្រាមួយគ្រឿងទៀត មិនចាំស្លាកលេខ ហើយក៏បានបើករត់បន្តឡើងទៅលើស្ពានអាកាសថ្មី ដែលកំពុងសាងសង់ បណ្តាលអោយរថយន្តបង្កខូចខាតយ៉ាងដំណំ បើកទៅមុខលែងរួចប៊ិះធ្លាក់ចុះពីលើស្ពាន ចំណែកម្ចាស់រថយន្តកាមរី បានដេញតាមដល់ចំណុចឃាត់រថយន្តបាន និងរងការខូចខាតកាងខាងក្រោយរថយន្ត ៕ ស រស្មី
