សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អនុរក្សពន្ធនាគារ នាំខ្លួនជនជាប់ចោទ ទេព វន្នី មកតុលាការកំពូល នៅថ្ងៃទី០៧ ខែកុម្ភៈ ឆ្នាំ២០១៨ នេះ ដើម្បីជំនុំជម្រះករណីប្រើអំពើហិង្សាលើសន្តិសុខពីរនាក់ បណ្តាលឲ្យរងរបួសធ្ងន់។
យោងតាមដីកាបង្គាប់ឱ្យយកខ្លួនរបស់តុលាការកំពូល ដែលទទួលបាន បង្ហាញថា ជនជាប់ចោទទេព វន្នី អាយុ៣៥ឆ្នាំ ជាប់ចោទពីបទ”ហិង្សាដោយចេតនាមានស្ថានទម្ងន់ទោស”ប្រព្រឹត្តនៅចំណុចខាងកើតវិមានឯករាជ្យ សង្កាត់ទន្លេបាសាក់ ខណ្ឌចំការមន កាលពីថ្ងៃទី១៣ ខែមិនា ឆ្នាំ២០១៣ ។
កន្លងមក សាលាដំបូងរាជធានីភ្នំពេញ និង សាលាឧទ្ធរណ៍ បានផ្តន្ទាទោសជនជាប់ចោទទេព វន្នី ដាក់ពន្ធនាគាររយៈពេល២ឆ្នាំ៦ខែ ពីបទ”ហិង្សាដោយចេតនាមានស្ថានទម្ងន់ទោស”តាមមាត្រា២១៨នៃក្រមព្រហ្មទណ្ឌ ។ ប៉ុន្តែជនជាប់ចោទទេព វន្នី មិនសុខចិត្តទើបប្តឹងសាទុក្ខ មកតុលាការកំពូល ៕ចេស្តា
